இந்தி மொழிபெயர்ப்பில் திருக்குறள் அதிகாரப் பெயர்கள்

இந்தி மொழிபெயர்ப்பில் திருக்குறள் அதிகாரப் பெயர்கள்

மு.முரளி, தமிழ் உதவிப் பேராசிரியர்,

கே.எஸ்.ஆா் மகளிர் கலை அறிவியல் கல்லூரி, திருச்செங்கோடு, நாமக்கல் மாவட்டம்

முன்னுரை

உலகப் பொதுமறை என்று போற்றப்படும் திருக்குறள் பிற இந்திய மொழிகளிலும் பல்வேறு வெளிநாட்டு மொழிகளிலும் வெளிவந்து சிறப்பைப் பெற்றுள்ளது. உலகில் அதிகமான மொழிகளில் மொழிபெயர்க்கப்பெற்றுள்ள நூல்களில் விவிலியத்திற்கு அடுத்தபடியாகத் திருக்குறளையே குறிப்பிடுவர். நூற்றிற்கும் மேற்பட்ட மொழிகளில் இதற்கு மொழிபெயர்ப்புகள் வந்ததன் வழி அதன் பெருமையை அறிந்து கொள்ள முடிகிறது. இந்தியாவில் உள்ள பெரும்பாலான மொழிகளில் மொழிபெயர்க்கப்பட்டுள்ள திருக்குறளுக்கு இந்தோ - ஆரிய மொழிக் குடும்பத்தைச் சேர்ந்த இந்தி மொழியில் மட்டும் பத்தொன்பது மொழிபெயர்ப்புகள் வெளிவந்துள்ளதை இணையதளக் குறிப்பின் வழி அறிய முடிகிறது (http://www.oocities.org/nvkashraf/kur-trans/Hind-Int.htm). இவ்வாறு ஒரு மொழியில் பல்வேறுபட்ட மொழிபெயர்ப்புகள் வந்துள்ள நிலையில் அவை பெயர்க்கப்பட்டுள்ள விதம் குறித்து ஒப்பிட்டு நோக்குவது உற்றுநோக்கத்தக்கதாகும். இந்தியில் திருக்குறளை மொழிபெயர்த்தப் பெயர்ப்பாளர்களில் கோவிந்தராஜ் ஜெயின் (1942), சு.சங்கரராஜீ நாயுடு (1958), கேமானந்தராஹத் (1960), பி.டி.ஜெயின் (1961), மா.கோ.வேங்கடகிருஷ்ணன் (1967), ராஜம் பிள்ளை மற்றும் நந்தகுமார் அவஸ்தி (1976), ரவீந்திரகுமார் சேட் மற்றும் எச். பாலசுப்பிரமணியம் (1999), ஆனந்த சந்திதத் (2000) போன்றோர் குறிப்பிடத்தக்கவராவர்கள். இவர்களில் 'கேமானந்தராஹத்' நேரடி மொழிபெயர்ப்பில்லாது ஆங்கிலம் வழியாகக் குறிப்பிட்ட சில குறள்களை மட்டும் மொழிபெயர்த்துள்ளார். மேற்சுட்டியவற்றுள் நேரடி மொழிபெயர்ப்பாக வெளியாகியுள்ள சு.சங்கரராஜீ நாயுடு, மா.கோ. வேங்கடகிருஷ்ணன், ரவீந்தரகுமார் சேட் மற்றும் எச். பாலசுப்பிரமணியம் ஆகியோரது மூன்று மொழிபெயர்ப்புகளின் அதிகாரத் தலைப்புகளை இங்கு ஓப்பீட்டிற்கு எடுத்துக்கொண்டு அதன் ஒற்றுமை வேற்றுமைகள் இனம் காணப்படுகிறது.

மூன்று மொழிபெயர்ப்பாளர்களின் ஒப்பீடு

          திருக்குறளை இந்தி மொழிக்கு நேரடியாக மொழிபெயர்த்துள்ள சங்கரராஜீ நாயுடு, ம.கோ. வேங்கட கிருஷ்ணன் மற்றும் ரவீந்திர குமார் சேட் & எச்.பாலசுப்பிரமணியம் ஆகியோரது மூன்று மொழிபெயர்ப்புகளின் அதிகாரத் தலைப்புகள் மூலமொழிக்குத் தக்கவாறு பெறுமொழியில் எவ்வாறு மொழிபெயர்க்கப் பெற்றுள்ளன என்பது சில சான்றுகளின் வழிப் பின்வருமாறு விளக்கப்படுகின்றது.

          இங்கு ஒற்றுமை வேற்றுமைகள் என்பது மூலமொழியில் இருந்து பெறுமொழிக்கு மொழிபெயர்த்ததில் பொருள் மாறுபடும் இடம், சொல் மாறுபடும் இடம் என்று இருவகையாகப் பிரித்து சான்றுகள் கொடுக்கப் பெற்றுள்ளன. 

பொருள் நிலையில் மாறுபடுமிடங்கள்

மூவரும் மூலத்திலிருந்து விலகி மொழிபெயர்ப்பைத் தருமிடம்

          ‘ஒப்புரவறிதல்’ என்னும் அதிகாரத் தலைப்பிற்கு மூன்று மொழிபெயர்ப்பாளர்கள் பெயர்த்துள்ள மொழிபெயர்ப்பு பின்வருமாறு கொடுக்கப்பட்டுள்ளது.

சங்கரராஜீ நாயுடு	शिष्टाचार का ज्ञन (ஷி2ஷ்டாசார் கா க்3யன்)
ம.கோ.வேங்கட கிருஷ்ணன்	लोकोपकारिता (லோகோ பகாரிதா)
ரவீந்திர் குமார் சேட்  & எச். பாலசுப்பிரமணியம்	लोकोपकार करना (லோகோ பகார் கர்னா)

          ஒப்புரவறிதல் எனும் அதிகாரத் தலைப்பானது ‘சமமாகப் பாவித்தல்’ என்னும் பொருண்மையைக் கொண்டதாகும். மொழிபெயர்ப்பாளர்கள் சங்கரராஜீ நாயுடு மரியாதை காத்தல் (ஷி²ஷ்டாசார் கா க்³யன்) என்றும் வேங்கட கிருஷ்ணன் உலகுக்கு உபகாரம் (லோகோ பகாரிதா) என்றும் ரவீந்தர் குமார் சேட் & எச். பாலசுப்பிரமணியம் பிறருக்கு உதவுதல் (லோகோ பகார் கர்னா) என்றும் மொழிபெயர்த்துள்ளனர். இம்மூன்று மொழிபெயர்ப்புகளும் மூலத்தின் ‘சமமாகப் பாவித்தல்’ என்ற பொருண்மையை நேரடியாக பெறுமொழி வாசகர்களுக்கு கொடுக்க முயற்சிக்காமல் மறைமுகமாக உணர்த்த முயற்சிக்கும் போது மூலத்தின் சரியான பொருள் வாசகர்களுக்கு சென்று சேராமல் மாறுபாடடைகிறது.

வேங்கடகிருஷ்ணன் பொருள் மாறுபாடு அடையும் இடம்

          ‘கொல்லாமை’ என்ற அதிகாரத் தலைப்புக்கு மொழிபெயர்ப்பாளர்கள் சங்கரராஜீ நாயுடுவும் ரவீந்தர் குமார் சேட் & எச். பாலசுப்பிரமணியமும் வேங்கட கிருஷ்ணன் அவர்களின் மொழிபெயர்ப்பில் இருந்து மாறுபடுவதைக் காணமுடிகிறது.  ‘கொல்லாமை’ எனும் அதிகாரத் தலைப்பிற்கு மொழிபெயர்ப்பாளர்கள் சங்கரராஜீ நாயுடுவும் ரவீந்தர் குமார் சேட் & எச். பாலசுப்பிரமணியமும் ‘அஹிம்ஸா’ (யாருக்கும் தீங்கு செய்யாமை) என்று மொழிபெயர்ப்பு செய்துள்ளனர். வேங்கட கிருஷ்ணன் கொல்லாமை என்பதற்கு வத்⁴ - நிஷேத்⁴ (கொலை தடுத்தல்) என்று மொழிபெயர்ப்பு செய்துள்ளார்.  

            ‘கொல்லாமை’ என்னும் அதிகாரத் தலைப்பிற்கு சங்கரராஜீ நாயுடுவும் ரவீந்தர் குமார் சேட் & எச். பாலசுப்பிரமணியமும் மொழிபெயர்த்துள்ள ‘அஹிம்ஸா’ என்னும் மொழிபெயர்ப்பானது ‘யாருக்கும் தீங்கு செய்யாமை’ என்ற பொதுப் பொருளிலேயே அமைகிறது. வேங்கடக் கிருஷ்ணன்  ‘கொல்லாமை’ என்னும் அதிகாரத் தலைப்பிற்கு ‘வத்⁴ - நிஷேத்⁴’ என்று மொழிபெயர்த்துள்ளது ‘கொலை தடுத்தல்’ என்ற பொருளில் அமைந்துள்ளது. இங்கனம் வேங்கடகிருஷ்ணனின் மொழிபெயர்ப்பானது மற்ற இரு மொழிபெயர்ப்புகளிலிருந்து மூல மொழிக்கு மிக நெருக்க உறவுடையதாக அமைந்துள்ளதை அறியமுடிகிறது.

2. மொழிபெயர்ப்பாளர்கள் சொல் நிலையில் மாறுபடும் இடங்கள்

          மொழிபெயர்ப்பாளர்கள் மேற்கண்டவாறு ஒரு சில இடங்களில் பொருள் நிலையில் குறைவாக மாறுபட்டாலும் சொல் நிலையில் பல்வேறு நிலைகளில் மாறுபடுகின்றனர். அவை பின்னிணைப்புகளாக அட்டவணைப்படுத்திக் கொடுக்கப்பட்டுள்ளன. அவற்றை சில சான்றுகள் வழி அறியலாம்.

மூவரும் மூலத்தின் சரியான மொழிபெயர்ப்பைத் தந்து மாறுபடுமிடம்

          ‘வான் சிறப்பு’ என்ற அதிகாரத் தலைப்பினை சங்கரராஜீ நாயுடு, வேங்கட கிருஷ்ணன், ரவீந்தர் குமார் சேட் & எச். பாலசுப்பிரமணியம் ஆகியோர் முறையே வர்ஷா வைஷி²ஷ்ட்ய (மழையின் சிறப்பு), வர்ஷா மஹத்வ (மழையின் பெருமை), வர்ஷா மஹிமா (மழையின் மகிமை) என்று மொழிபெயர்த்துள்ளனர். வான் என்பதற்கு वर्षा (வர்ஷா) என்ற சொல்லையே மொழிபெயர்ப்பாளர்கள் தங்கள் மொழிபெயர்ப்புகளில் பயன்படுத்தியுள்ளனர். இவ்வதிகாரத்தின் தலைப்பானது ‘வான் சிறப்பு’ என்று மூலமொழியில் இருப்பினும் அதிலுள்ள பத்து குறள்களும் மழையின் சிறப்பினை உணர்த்துவதாகவே அமைந்துள்ளன. இங்கு வான் என்பது மழைக்கு ஆகுபெயராகி வந்துள்ளது. இக்காரணத்தினாலேயே மொழிபெயர்ப்பாளர்கள் वर्षा (வர்ஷா) என்ற சொல்லுக்கு ‘மழை’ என்று மொழிபெயர்ப்பு செய்துள்ளனர். இது மொழிபெயர்ப்பாளர்களின் கூர்ந்து நோக்கும் தன்மைக்குச் சான்றாக அமைகிறது. 

சங்கரராஜீ நாயுடு சொல் நிலையில் மாறுபாடு அடையுமிடம்

           ‘கடவுள் வாழ்த்து’ என்னும் அதிகாரத் தலைப்பினை மொழிபெயர்க்கையில் மொழிபெயர்ப்பாளர்கள் வேங்கட கிருஷ்ணன், ரவீந்தர் குமார் சேட் & எச். பாலசுப்பிரமணியம் ஆகியோரிடமிருந்து மொழிபெயர்ப்பாளர் சங்கரராஜீ நாயுடு சொல் நிலையில் மாறுபடுவதைக் காணமுடிகிறது. ईश्वर-स्तुति (ஈஷ்²வர் – ஸ்துதி), ईश-वन्दना (ஈஷ்² வந்த³னா) என்பது வேங்கட கிருஷ்ணன், ரவீந்திர் குமார் சேட் ஆகியோரது மொழிபெயர்ப்பாகும். இதற்கு கடவுள் வாழ்த்து, கடவுள் வணக்கம் என்று பொருளமைகிறது. சங்கரராஜீ நாயுடு தனது மொழிபெயர்ப்பில் सर्वेश स्तुति (ஸர்வேஷ்² ஸ்துதி) என்று மொழிபெயர்ப்பு செய்துள்ளார். இதற்கு நேரடியான பொருள் ‘அனைத்துக்கும் மேலானவன் வாழ்த்து’ என்று அமைகிறது. இவ்வாறு நேரடியான சொற்களை பயன்படுத்தாது உயர்வுச் சொற்களாகவோ அல்லது மிகைப்படுத்தி கூறலாகவோ மொழிபெயர்ப்பு அமைத்துள்ளதை அறியலாம்.        

ரவீந்திர் குமார் & எச். பாலசுப்பிரமணியம் சொல் நிலையில் மாறுபடுதல்

          ரவீந்தர் குமார் & எச்.பாலசுப்பிரமணியம் இருவரும் தங்கள் மொழிபெயர்ப்புகளில் மூல மொழியில் இல்லாத சொற்களை தேவைக்கு அதிகமாகப் பயன்படுத்தியுள்ளனர். பொச்சாவாமை, வெருவந்த செய்யாமை என்னும் அதிகாரத் தலைப்பினை உற்றுநோக்கலின் வழி இதனை அறிய முடிகிறது.

பொச்சாவாமை என்பதற்கு ‘மறவாமை’ என்பதே பொருளாக அமைகின்றது. மொழிபெயர்ப்பாளர்கள் வேங்கட கிருஷ்ணனும் சங்கரராஜீவும் இதற்கு மறவாமை (அவிஸ்ம்ருதி) என்றே மொழிபெயர்த்துள்ளனர். மொழிபெயர்ப்பாளர்கள் ரவீந்தர் குமார் & எச். பாலசுப்பிரமணியம் இருவரும் ‘கடமை மறவாமை’ (கத்ரதவ்ய ந பூ⁴ல்னா) என்று மொழிபெயர்ப்பு செய்துள்ளனர். இதில் கடமை என்பது மொழிபெயர்ப்பில் புதியதாக சேர்க்கப்பட்ட சொல்லாக அமைகிறது. இங்கனம் அரசருக்கு  இருக்கக் கூடிய ஒரு பண்பை விளக்கும் முகத்தான் கூறப்பட்டமையால் மொழிபெயர்ப்பாளர்கள் ‘கடமை’ என்னும் சொல்லை மொழிபெயர்ப்பில் சேர்த்திருக்கலாம் என எண்ண வாய்ப்பிருக்கிறது.  

மற்றொரு அதிகாரத் தலைப்பான வெருவந்த செய்யாமை என்பதற்கு ‘அச்சம் தரும் செயல் செய்யாமை’ என்பது பொருளாகும். மொழிபெயர்ப்பாளர்கள் சங்கரராஜீ நாயுடு வேங்கட கிருஷ்ணன் இருவரும் தங்களது மொழிபெயர்ப்பில் மூலத்திற்கு நிகரான சொற்களையே பயன்படுத்தியுள்ளனர். ரவீந்திர குமார் & எச்.பாலசுப்பிரமணியம் இருவரது மொழிபெயர்ப்பில் ‘தண்டனை விதிக்கையில் இரக்கம் காட்டல்’ (தண்ட³ மே(ங்) நர்மீ தி³கா²னா) என்று மொழிபெயர்ப்பு செய்துள்ளனர். ‘தண்டனை விதிக்கையில்’ என்று பொதுவாகக் கூற எண்ணாமல் அரசனுக்கு உரிய பண்பைச் சுட்டும் விதமாக குறள்கள் அமைந்திருப்பதால் அதிகாரத் தலைப்பில் மொழிபெயர்ப்பாளர் தனது மொழிபெயர்ப்பில் பொருள் புரிதலுக்காகக்  கூடுதல் சொற்களைக் கையாண்டிருக்க எண்ணியிருக்கலாம்.                          

மூவரும் ஒன்றுபடுமிடங்கள்

          சங்கரராஜீ நாயுடு, வேங்கட கிருஷ்ணன், ரவீந்தர் குமார் & எச்.பாலசுப்பிரமணியம் ஆகியோர் இல்வாழ்க்கை, விருந்தோம்பல், செய்ந்நன்றி அறிதல், நடுவுநிலைமை, பிறனில் விழையாமை, பொறுமை, பொறாமை என நாற்பத்தி ஆறு அதிகாரத் தலைப்புகளில் சொல் நிலையிலும் பொருள் நிலையிலும் ஒன்றுபடுவதைக் அவர்களின் மொழிபெயர்ப்பின் வழி அறிய முடிகிறது.

முடிவுரை

          மூலத்தில் உள்ள ஒரு சொல்லுக்கு, அதே பொருளில் வெவ்வேறு சொற்களை அமைத்து சு.சங்கரராஜீ நாயுடு, மா.கோ. வேங்கடகிருஷ்ணன், ரவீந்தரகுமார் சேட் மற்றும் எச். பாலசுப்பிரமணியம் ஆகியோர் மொழிபெயர்ப்பில் சொல் நிலையில் வேறுபடுகின்றனர். சொல் நிலையில் மட்டுமல்லாது பொருள் நிலையிலும் சில இடங்களில் மாறுபடுவதைச் சான்றுகள் வழிக் கண்டோம். இம்மூவரின் மொழிபெயர்ப்பும் தமிழிலிருந்து இந்திக்கு நேரடி மொழிபெயர்ப்பு என்பதால் சொல் நிலையில் மட்டுமே அதிகமாக மாறுபட்டு பொருள் நிலையில் குறைந்த ஒரு சில இடங்களில் மட்டும் மாறுபடுகின்றனர். ஒரு படைப்புக்குப் பிறிதொரு மொழியில் ஒன்றுக்கு மேற்பட்ட மொழிபெயர்ப்புகள் வரும் போது குறிப்பிடத்தக்க அளவில் ஒருபொருட் பன்மொழிகள் பெறு மொழிக்கு (Target Language) கிடைக்கின்றன. இது மொழிபெயர்ப்பின் வழி ஏற்படும் நன்மைகளுள் ஒன்றாகும். ஒரு படைப்புக்கு கிடைக்கும் பல்வேறு மொழிபெயர்ப்புக்களை ஒப்பிட இலக்கணம், மொழியியல் சார்ந்த இந்தப் பகுப்பாய்வை இன்னும் விரிவுபடுத்த வாய்ப்பிருக்கிறது. மொழிபெயர்ப்பு ஒப்பீடு பற்றிக் கோட்பாட்டு அடிப்படையிலும் சிந்திக்கவும் வாய்ப்பிருக்கிறது.

நன்றி : பேரா. எச். பாலசுப்பிரமணியம்

துணைநூற்பட்டியல்

முதன்மை ஆதாரங்கள்

சங்கரராஜீ நாயுடு (மொ.ஆ), (1958), திருவள்ளுவர் கிருத் திருக்குறள், சென்னை, சென்னைப் பல்கலைக்கழகம்.

புலியூர் கேசிகன் (ப.ஆ), (2009), திருக்குறள் பரிமேழலகர் உரை, சென்னை, பூம்புகார் பதிப்பகம்.

ரவீந்தர் குமார் சேத், பாலசுப்பிரமணியம், எச், (1999), திருக்குறள், புதுதில்லி, சாகித்ய ஷோத் சன்ஸ்தான்.

வேங்கட கிருஷ்ணன், எம்.ஜி, (1967), திருக்குறள், சென்னை, சக்தி பைனான்ஸ் லிமிடெட்.

துணைமை ஆதாரங்கள்

வரதராசன், மு.வ. (2008), திருக்குறள் தெளிவுரை, சென்னை: தென்னிந்திய சைவசித்தானந்த நூற்பதிப்புக் கழகத்தார்.  

அகராதிகள்

சௌமியநாராயணன், டா.எஸ்.2010 (ஒ.ப) அகஸ்தியர் இந்தி – இந்தி – தமிழ் –ஆங்கில அகராதி, திருச்சி, அகஸ்தியர் பப்ளிகேஷன்ஸ்.

ராமாரவிடிட்ட், கிருஷ்ணமூர்த்தி, சி.என், குருமூர்த்தி, என். (2005), இந்தி - தமிழ்-ஆங்கிலம் மும்மொழி அகராதி, சென்னை, யங் மைண்ட்ஸ் பப்ளிஷர்ஸ்.

ஜகந்நாதன், வி.ரா. 2009. சாத்ரகோஷ் இந்தி – ஆங்கில அகராதி, புதுதில்லி, ஜனே பாபப்ளிஷர்ஸ்.

அட்டவணை: 1

மொழிபெயர்ப்பாளர்கள் ஒன்றுபடுமிடங்களும் வேறுபடுமிடங்களும்:

இடங்களின் எண்ணிக்கை	அதிகாரத் தலைப்புகள்
1.    மூவரும் ஒன்றுபடும் இடங்கள் = 46	5, 9, 11, 12, 15, 16, 17, 18, 23, 27, 29, 35, 38, 40, 41, 42, 43, 44, 50, 55, 61, 68, 75, 79, 84, 90, 94, 95, 96, 98, 100,101, 102, 104, 105, 106, 107, 108, 110, 116, 120, 122, 124, 129, 131, 133
2.    சங்கரராஜீ நாயுடுவும் ம.கோ.வேங்கட கிருஷ்ணனும் ஒன்றுபடும் இடங்கள் = 18	10, 19, 24, 25, 48, 54, 66, 67, 69, 71, 73, 92, 97, 99,118, 119, 130, 132
3.    ம.கோ.வேங்கட கிருஷ்ணனும் ரவீந்திர குமார் சேட் & எச். பாலசுப்பிரமணியம் ஒன்றுபடும் இடங்கள் = 14	3, 4, 14, 31, 34, 37, 39, 112, 114, 115, 117, 125, 126, 128
4.    சங்கரராஜீ நாயுடுவும் ரவீந்திர குமார் சேட் & எச். பாலசுப்பிரமணியம் ஆகியோர் ஒன்றுபடும் இடங்கள் = 7	7, 21, 32, 33, 93, 111, 123
5.    மூவரும் வேறுபடும் இடங்கள் = 48	1, 2, 6, 8, 13, 20, 22, 26, 28, 30, 36, 45, 46, 47, 49, 51, 52, 53, 56, 57, 58, 59, 60, 62, 63, 64, 65, 70, 72, 74, 76, 77, 78, 80, 81, 82, 83, 85, 86, 87, 88, 89, 91, 103, 109, 113, 121, 127,

           

            

திருக்குறள் மொழிபெயர்ப்புகளில் மனிதனும், கணினியும்

திருக்குறள் மொழிபெயர்ப்புகளில் மனிதனும், கணினியும்

முனைவர் இரா.குணசீலன்;

தமிழ் உதவிப் பேராசிரியர்

கே.எஸ்.ஆர் மகளிர் கலை அறிவியல் கல்லூரி

திருச்செங்கோடு

திருக்குறள் மொழிபெயர்ப்பில் மனிதனின் உழைப்பையும், கணினியின் தேவையையும் எடுத்துரைத்து கணினிக்கு திருக்குறள் சார்ந்த அறிவைக் கற்பிக்கும் வழிமுறைகளைக் கூறுகிறது இகட்டுரை.

                          உயர்தனிச் செம்மொழியாம் தமிழின் செம்மைத் தன்மைக்கு சான்று பகரும் நூல்களுள் ஒன்று திருக்குறள். மதம் சார்ந்து பரப்பப்பட்ட விவிலியத்துக்கு அடுத்து நூறு மொழிகளுக்கு மேல் மொழிபெயர்க்கப்பட்ட பெருமைக்குரியது இந்நூல். திருக்குறள் கடல் என்றால் அதன் உரைகள் கடலின் நிழற்படங்களைப் போன்றன. மொழிபெயர்ப்புகள் கடலின் காணொளிகளைப் போன்றன. நிழற்படங்களோ, காணொளிகளோ கடலின் முழுமையான தோற்றத்தைக் காட்டிவிடமுடியாது என்றாலும், கடலைத் தம் வாழ்நாளில் ஒரு முறை கூடக் காணாதவர் கடலின் நிழற்படத்தையோ, காணொளியையோ காணும்போது கடலை நேரில் காணவேண்டும் என்ற ஆர்வம் ஏற்படும். அதுபோலத்தான் இந்த உரைகளும், மொழிபெயர்ப்புகளும். உரைகள் குறளை தமிழர்களிடம் பரவச் செய்தன என்றால் மொழிபெயர்ப்புகள் குறளை உலகமக்களிடம் கொண்டு சேர்த்தன. திருக்குறள் மொழிபெயர்ப்புகளில் மனிதனின் உழைப்பையும், கணினியின் தேவையையும் எடுத்துரைத்து திருக்குறள் மொழிபெயர்ப்பின் எதிர்காலத்தை எடுத்தியம்புவதாக இக்கட்டுரை அமைகிறது.

திருக்குறள் மொழி பெயர்ப்பின் தேவை

                நாம் எந்தப் பொருள் வாங்கினாலும் அதை எப்படிப் பயன்படுத்தவேண்டும் என்ற செயல் விளக்கக் கையேடும் அதோடு வழங்குவார்கள். ஆனால் எந்தக் குழந்தையும் தம் வாழ்க்கையை எப்படி வாழவேண்டும் என்ற வழிகாட்டும் விளக்கக் குறிப்பேட்டுடன் பிறப்பதில்லை. மனிதனின் பிறப்பு மட்டும் புதிரானதாக இருக்கிறது. இந்த வாழ்க்கையை எப்படி வாழவேண்டும் என்ற கேள்வி எல்லோரிடமும் உள்ளது. அந்தக் கேள்விக்கான பதில்களை உள்ளடக்கிய நூல்களுள் ஒன்று திருக்குறள் என்பதால் இந்நூல் பலமொழிகளில் மொழிபெயர்க்கப்பட்டு வருகிறது.

                நவில்தொறும் நூல்நயம் போலும் என்ற தொடர் இந்தத் திருக்குறளை ஏன் ஒவ்வொருவரும் வாசிக்கிறார்கள்? வாசிக்கச் சொல்கிறார்கள் என்ற கேள்விக்குப் பதிலாக அமைகிறது. ஒவ்வொருமுறை வாசிக்கும்போதும் ஒவ்வொருவருக்கும் வெவ்வேறு சிந்தனைகளைத் தரும் கருவூலமாகவே இந்நூல் திகழ்கிறது. திருக்குறளை வைத்து வள்ளுவர் இந்தத்துறையில்தான் சிறந்தவர் என்று பகுத்தறிய இயலாது. உழவாக இருந்தாலும் மருத்துவமாக இருந்தாலும் அதில் நுட்பமான அறிவுடையவராகவே வள்ளுவர் தோன்றுகிறார். பல்வேறு துறைகளையும் வள்ளுவர் எடுத்துரைத்துள்ளதால் பல்வேறு துறை சார்ந்தவர்களும் திருக்குறளைக் கொண்டாடுகின்றனர். மேலும் தமிழின் பெருமையை உலகறியச் செய்யவும், மனித இனம் நல்வழியில் வாழவும் திருக்குறள் போன்ற நூல்கள் மொழிபெயர்க்கப்படுவது காலத்தின் தேவை.

திருக்குறள் மொழிபெயர்ப்பில் மனிதன்                   

                வணிகம் செய்யவும், சமயத்தைப் பரப்பவும் வந்த வெளிநாட்டவர்கள் தமிழின் இனிமையைக் கண்டு வியந்தனர். திருக்குறளின் பொதுமைத் தன்மையையும், சிறப்பியல்புகளையும் கண்ட இத்தாலி நாட்டு கிறித்துவ பாதிரியார் வீரமாமுனிவர் கிபி 1730 ஆம் ஆண்டிலேயே இலத்தீன் மொழியில் மொழிபெயர்த்தார். அவரைத் தொடர்ந்து பலரும் ஐரோப்பிய மொழிகளிலும் பிற மொழிகளிலும் திருக்குறளை மொழி பெயர்த்தனர். சான்றாக,

செயற்கரிய செய்வார் பெரியர் சிறியர்

                செயற்கரிய செய்கலா தார் 26 என்ற குறளுக்கு, செய்வதற்கு அருமையான செயல்களைச் செய்ய வல்லவரே பெரியோர். செய்வதற்கு அரிய செயல்களைச் செய்யமாட்டாதவர் சிறியோர் என உரை வகுப்பார் மு.வ. இந்தக் குறளுக்கு ஜியு.போப் அவர்கள்,

                Things hard in the doing will great men do;

            Things hard in the doing the mean eschew. 26 என்றும்,

யோகி சுத்தானந்த பாரதி அவர்கள்

                                    The small the paths of ease pursue

                        The great achieve things rare to do என்றும் மொழிபெயர்த்துள்ளார். திருக்குறளின் மூல அடிகள் ஒரே மொழியில் விளக்கும்போது வெவ்வேறு நிலைகளில், சொல், மற்றும் தொடர்களால் மாறுபடுகின்றன. தமிழ்மொழியிலிருந்து வேறு மொழிக்கு மொழிபெயர்க்கப்படும்போது இந்த மாற்றம் இன்னும் இலக்குமொழியின் சூழலுக்கு ஏற்ப மாறிவிடுகிறது.

இந்திய மொழிகள்

குஜராத்தி, இந்தி, வங்காளம், கன்னடம், கொங்கணி, மலையாளம், மராத்தி, மணிப்புரி, ஒரியா, பஞ்சாபி, இராஜஸ்தானி, சமற்கிருதம், சௌராட்டிர மொழி, தெலுங்கு போன்ற 14 மொழிகளிலும் மொழிபெயர்க்கப்பட்டுள்ளது

ஆசிய மொழிகள்

அரபி, பருமிய மொழி, சீனம், பிஜியன், இந்தோனேசியம், யப்பானியம், கொரியா, மலாய், சிங்களம், உருது போன்ற 10 மொழிகளிலும் மொழிபெயர்க்கப்பட்டுள்ளது.

ஐரோப்பிய மொழிகள்

செக், டச்சு, ஆங்கிலம், பின்னிய மொழி, பிரெஞ்சுமொழி, செருமன், அங்கேரிய மொழி, இத்தாலிய மொழி, இலத்தீன், நார்வே மொழி, போலிய மொழி, ரசிய மொழி, எசுப்பானியம், சுவீடிய மொழி ஆகிய 14 ஐரோப்பிய மொழிகளிலும் மொழிபெயர்க்கப்பட்டுள்ளது.

மேற்கண்ட திருக்குறள் மொழிபெயர்ப்புகள் யாவும் மனிதனின் உழைப்பால் இந்த வையத்துக்குக் கிடைத்த கொடைகளாகும்.

மொழிபெயர்ப்பில் உரைகளின் ஆளுமை

                திருக்குறள் மொழிபெயர்ப்பில் மூல அடிகள் பொருள் புரியாத நிலையில் உரைகளின் வழி புரிந்துகொண்டு மொழிபெயர்க்கும் வாய்ப்பும் உள்ளதால் மொழிபெயர்ப்பில் உரைகளும் சிறப்பிடம் பெறுகின்றன. உரையாசிரியர்களின் செல்வாக்கு, மொழிபெயர்ப்பாளர்களிடமும் காணப்படுகிறது. எல்லீசு என்னும் அறிஞர் அறத்துப்பாலுக்குத் தாம் மொழிபெயர்த்த 304 குறள்களுக்கு 300 நூல்களை மேற்கோள் காட்டியுள்ளார். திருக்குறளின் ஆழ்ந்த பொருளை நுட்பமாக உணர்ந்துகொள்ளவும், உணரவைக்கவும் உரைகள் தேவை என்பதை இதனால் உணரலாம். திருக்குறளுக்கு எழுதப்பட்ட 300க்கும் மேற்பட்ட உரைகளுள் பரிமேலழகர், மு.வ ஆகியோரின் செல்வாக்கு குறிப்பிடத்தக்கதாக அமைகிறது.

மனித மொழிபெயர்ப்பின் இடர்பாடுகள்                    

                மனித மொழிபெயர்ப்பில் மொழிப்புலமை, இலக்கண அறிவு, உலகியல் அறிவு, தமிழர் பண்பாட்டு அறிவு ஆகியன தேவைப்படுகின்றன. உரைகளைக் கடந்து குறளின் மூலஅடிகளைப் புரிந்துகொள்ளும் இயல்பும் மொழிபெயர்பாளரின் அடிப்படைத் தேவையாகிறது. இவற்றில் ஏதோ ஒன்று குறைவாக இருந்தாலும் அந்த மொழிபெயர்ப்பு முழுமையாக பெயர்க்கப்படும் மொழிக்கு சென்று சேர இயலாத நிலை ஏற்படுகிறது.

திருக்குறள் மொழிபெயர்ப்பில் கணினி

                இன்று உலகின் ஒரே மொழி கணினி. கணினியை எந்தமொழி சார்ந்தவரும் தம் மொழியிலேயே பயன்படுத்த முடியும் என்ற தன்னிறைவை அடைந்துள்ளனர். தமிழ் எழுத்துருவை கணினியில் பயன்படுத்தவே இயலாமல் தவித்த காலங்களைக் கடந்து இன்று ஒருங்குறி எழுத்துருவால் இணையத்தில் எங்கும் தமிழ் எழுதுகிறோம். எழுத்துக்களைப் பேச்சாகவும், பேச்சை எழுத்தாகவும், எழுத்துருக்களை மாற்றவும், எந்த மொழியில் உள்ள எழுத்துக்களையும் மொழிபெயர்க்க இயலும் என்ற நிலையை நாம் இன்று அடைந்துள்ளோம். கணினிகளுக்கு செயற்கை நுண்ணறிவுத்திறனை ஊட்டிவரும் இன்றைய ஆய்வுகள் எதிர்காலத்தில் கற்பனைக்கும் எட்டாத உயரங்களைத் தொடக்கூடும். இந்நிலையில் திருக்குறள் மொழிபெயர்ப்புகளில் கணினிகள் சிறப்பான பங்காற்றிவருகின்றன. ஒரு மொழிபெயர்ப்பாளருக்குத் தேவையான தகுதிகள் யாவும் இன்று ஒரு கணினிக்கு ஊட்டப்பட்டு வருகின்றன. விக்கிப்பீடியாவிலும், கூகுள் மொழிமாற்றித் தொழில்நுட்பத்திலும் இன்று திருக்குறள் மொழி பெயர்ப்பு முயற்சிகளைக் காணமுடிகிறது.

காலத்துக்கு ஏற்ற குறளின் வடிவங்கள்

                சுவடிகளில் இருந்த திருக்குறள் அச்சாக்கம் பெற்று உரைவிளக்கம் பெற்று, ஒலியாகவும், காணொளியாகவும் மாறி கணினியின் வரவால் இணையத்திலும் வலைப்பதிவுகளிலும் யுடியூப்பிலும் பரவலாக்கம் பெற்று இன்று குறுஞ்செயலிகளாக பல்வேறு வடிவங்களில் வாசிப்பில் உள்ளது. கட்டுக்கட்டாக இருந்த திருக்குறள்களை இன்று சிறிய ஆப்சு என்னும் குறுஞ்செயலியில் வாசிக்கமுடியும். அதில் குறள் அதன் பல்வேறு உரைகள், அதன் மொழிபெயர்ப்பு, விளக்கம் என்று தொழில்நுட்பம் திருக்குறளை உலகமக்களின் பார்வைக்குக் கொண்டு சேர்த்துள்ளது.

இணையத்தில் திருக்குறள் மொழி பெயர்ப்புகள்

                1. http://tamilelibrary.org/teli/thkrl.htmlஉலக அளவில் திருக்குறள் மொழிபெயர்க்கப்பட்ட விவரங்களை உள்ளடக்கியதாக இவ்விணையதளம் விளங்குகிறது.

                2. http://tamilvu.org/library/libindex.htm திருக்குறளுக்கான உரைகளுள், பரிமேலழகர், மு.வரதராசனார், மணக்குடவர், ஞா.தேவநேயப் பாவாணர் ஆகியோரின் தமிழ் உரைகளுடன் ஜியு.போப் மற்றும் யோகி சுத்தானந்த பாரதியாரின் ஆங்கில உரைகளும் காணக் கிடைக்கின்றன. மேலும் இசைவடிவில் திருக்குறளையும், சீனம் மற்றும் அரபி மொழியில் திருக்குறள் மொழிபெயர்ப்புகளைக் கொண்டதாக இவ்விணையதளம் திகழ்கிறது.

                3. . http://www.oocities.org/nvkashraf/kur-trans/languages.htm என்ற இணையதளம் திருக்குறள் மொழிபெயர்ப்புகளை ஒருங்குறி வடிவில் வரிசைப்படுத்தியுள்ளது.

கணினி மொழிபெயர்ப்பின் இடர்பாடுகள்

                விரைந்து தொழில்கேட்கும் ஞாலம் நிரந்தினிது

                சொல்லுதல் வல்லார்ப் பெறின் - 648

என்ற குறளுக்கு ஏற்ப கணினி செய்யவேண்டிய பணிகளை  ஒழுங்காக அதற்குப் புரியுமாறு சொல்லவல்லவரைப் பெற்றால் கணினி விரைந்து அவருடைய ஏவலைக் கேட்டு நடக்கும். ஆனால் கணினி மொழிபெயர்ப்பு இன்னும் முழுமையானதாக இல்லை. தமிழ் மொழியிலிருந்து ஆங்கிலத்துக்கோ, சீனமொழிக்கோ அல்லது வேறு ஏதோ ஒரு மொழிக்கோ கூகுள் மொழி மாற்றி மூலம் மொழி பெயர்த்தால் 60 விழுக்காடுதான் சரியான மொழிபெயர்ப்பு வருகிறது. 100 விழுக்காடு மொழிபெயர்ப்பு வரவில்லை. கணினிக்குப் புரியுமாறு கட்டளைகளை முறைப்படி சொல்லத் தேவையான தமிழ்மொழியறிவு கணினித்துறை சார்ந்தவருக்கும், தமிழ்த்துறை சார்ந்தவருக்குக் கணினி அறிவும் இல்லாமை கணினி மொழிபெயர்ப்பின் குறைபாடுகளுள் ஒன்றாகும்.

கணினிக்குத் தேவையான செயற்கை நுண்ணறிவு

                திருக்குறள் மொழிபெயர்ப்பானது உலகமொழிகள் யாவற்றிலும் முழுமையாக சென்று சேர கணினித் தொழில்நுட்பம் தேவையான ஒன்றாகும். இதுவரை இணையப்பரப்பில் கிடைக்கும் திருக்குறள் குறித்த ஒருங்குறி வடிவிலான மூலபாடங்களையும், உரைகளையும், மொழிபெயர்ப்புகளையும் ஒரே இணைப்பில் கொண்டுவரவேண்டும். ஒருங்குறி வடிவில் தமிழ் எழுத்துருக்கள் வந்ததால் இன்று திருக்குறளில் ஆளப்பட்ட சொல்லையோ, எழுத்தையே கணினி இனம் கண்டுகொள்வது மிகவும் எளிதான செயலாகும். சான்றாக,  அறிவு என்று தேடினால் சில நொடிகளில் 17 குறள்களில் இந்த சொல் இடம்பெற்றுள்ளது என்று கணினி  சொல்லிவிடும். அரிது என்ற சொல்லைத் தேடினால் 18 குறள்களில் இச்சொல் இடம்பெற்றுள்ளது என்று திறன்பேசியில் உள்ள ஒரு திருக்குறள் செயலி கூட சொல்லிவிடும். இந்நிலையில் இன்னும் நுட்பமாக ஒரு சொல்லை வள்ளுவர் எந்தெந்த பொருள்களில் பயன்படுத்தியுள்ளார் என்றும், உரையாசிரியர்கள் தாம் கூறும் கருத்துக்களை எவ்வாறெல்லாம் விளக்கியுள்ளார்கள் என்பதையும் கூட கணினிக்கு சொல்லித்தரவேண்டும். பாடபேதங்களையும், பண்பாட்டுக் கூறுகளையும், வட்டார வழக்குச் சொற்களையும், சமய, தத்துவ விளக்களையும் கணினிக்கு ஒருமுறை கட்டளையாகக் கற்பித்தால் திருக்குறள் மொழிபெயர்ப்பானது இன்னும் செம்மைத் தன்மையுடையதாக உலகமே போற்றக்கூடிய அறிவுக் கருவூலமாகத் திகழும்.

எதிர்காலத்தில் திருக்குறள் மொழிபெயர்ப்புகள்

                கணினிக்குத் தேவையான செயற்கை நுண்ணறிவை ஊட்டிவிட்டால் கணினி சார்ந்த திருக்குறள் மொழிபெயர்ப்புகள் இன்னும் ஆழமானதாக, அதே நேரம் எளிமையானதாகவும் அந்தந்த மொழிகளுக்கு ஏற்ப புரியும்விதமாக அமையும். சான்றாக கல்வி குறித்தோ மருந்து குறித்தோ நட்பு குறித்தோ நாம் மேற்கோள்களை கணினியில் தேடினால் கூகுள் தேடுபொறி செய்தி வழங்குவதுபோல, நாம் எந்த மொழியில் குறளையும், விளக்கத்தையும் காண விரும்புகிறோம் என்ற வழிகாட்டுதலுடன் பல்வேறு மேற்கோள்களுடன் ஒலி, மற்றும் காணொளி வடிவில் கூடக் காணக் கிடைக்கும். மேலும் அன்றாட வாழ்வில் நாம் பேசும் சூழல்களுக்கு ஏற்ப குறள் குறித்த பரிந்துரைகளை கணினியில் செயலிகள் வழங்கும்விதமாகக் கூடச் செய்யலாம்.

                சான்றாக சமூகத் தளத்தில் ஒருவருடன் உரையாடிக்கொண்டிருக்கும்போது, இன்னொருவரைப் பற்றி இவர் எவ்வளவு பெரிய அறிவாளி, மிகச்சிறந்த பேச்சாளரான  இவர் எப்படி இந்த அடிப்படைச் செய்திகூட தெரியாதவராக இருக்கிறார் என்று தாம் மனதளவில் மிகப் போற்றிய ஒருவரின் அறியாமை குறித்துப் பேசுகிறார் என்றால் அவருக்குப் புரியும்விதமாக குறள் வழியாக என்ன பதில் சொல்லலாம் என்று கணினியிடம் கேட்டால் கணினி தம் தரவுத்தளத்திலிருந்து திருக்குறள் மூலம் மட்டும் போதுமா? இல்லை உரைவிளக்கம் வேண்டுமா? எந்த மொழியில் வேண்டும் என்று கேட்கும் அளவுக்கு மொழிபெயர்ப்பை உருவாக்கமுடியும். அதற்குப் பதிலாக எனக்கு இதற்கு ஏற்ற திருக்குறள் தமிழில் மூலம் மட்டும் போதும் என்று சொன்னால் சில மணித்துளிகளில்,

                அரிய கற்று ஆசற்றார் கண்ணும் தெரியுங்கால்

                இன்மை அரிதே வெளிறு – 503

என்று கணினி பதிலளிக்கலாம். இதற்கு விளக்கம் வேண்டுமானால், கணினி ஒலி வடிவில் கூட விளக்கம் தரலாம். அரிய நூல்களைக் கற்றுத் தேர்ந்த குற்றமற்றவரிடத்திலும் ஆராய்ந்து பார்த்தால் அறியாமை இருக்கும் என்று. இதற்கு வேறு உரையாசிரியர்களின் மேற்கோள் வேண்டும் என்று கேட்டால் அதையும் கணினி சொல்லும்விதமாக கணினிக்கு நாம் கட்டளையிடமுடியும்.

நிறைவாக

                 கற்றோர் மட்டும் படித்து மகிழ்ந்த திருக்குறள் உரையாசிரியர்களால் கல்லாதவர்களும் அறிந்துகொள்ளும் நிலைக்கு வந்தது. தமிழர் மட்டும் கொண்டாடிய திருக்குறள் மொழிபெயர்ப்பாளர்களால் உலகமே கொண்டாடும் உயர்ந்த நிலையை அடைந்துள்ளது. மதம் சார்ந்து பரப்பப்படும் நூல்களுக்கு இடையில் கருத்தால் மக்கள் மனதைக் கவர்ந்த இலக்கியமாகத் திகழ்கிறது இந்நூல். திருக்குறள். மொழிபெயர்ப்பில் மனிதர்களின் முயற்சியால் நூற்றுக்கும் மேற்பட்ட மொழிகளில் இந்நூலுல் வாசிக்கும் வாய்ப்பு ஏற்பட்டுள்ளது. இருந்தாலும் தமிழில் மூலஅடிகளை வாசிக்கும் நிறைவு மொழிபெயர்ப்பில் முழுமையாகக் கிடைக்கவில்லை என்பது உண்மை. அதற்கு தமிழ்மொழியின் இலக்கண மரபுகளும், சொல் மற்றும் தொடர் நிலையில் வள்ளுவரின் ஆளுமைத் திறனும் பிறமொழிகளில் மாற்றும் போது அதற்கிணையாக இல்லை என்பதையும் நாம் கருத்தில்கொள்ளவேண்டும். ஒவ்வொரு மொழிபெயர்ப்பாளரும் தம் அறிவுக்கேற்ப தம் புரிதலுக்கேற்ப மொழிபெயர்த்துள்ளனர். திருக்குறள் மொழிபெயர்ப்பில் தமிழ்இணையக் கல்விக்கழகம், மற்றும் விக்கிப்பீடியா ஆகிய தளங்கள் குறிப்பிடத்தக்கனவாகத் திகழ்கின்றன. கூகுள் மொழிமாற்றித் தொழில்நுட்பம் இன்னும் பல மொழிகளில் குறளை மொழிபெயர்க்கும் வாய்ப்பை ஏற்படுத்தியுள்ளது. குறுஞ்செயலிகளில் திருக்குறள் மொழிபெயர்ப்புகள் காணக்கிடைக்கின்றன. இன்றைய கணினிகளுக்கு செயற்கை நுண்ணறிவை ஊட்டிவருவதால் எதிர்காலத்தில் கற்பனைக்கும் எட்டாத அளவில் திருக்குறள் மொழிபெயர்ப்புகள் எளிமையாகும் வாய்ப்பு உள்ளது. அதற்கு கணினிக்கு இன்னும் நிறைய தமிழறிவை ஊட்டவேண்டும். இதுவரை வந்த திருக்குறள் உரைகளையும், மேற்கோள்களையும், மொழிபெயர்ப்புகளையும் ஒருங்குறி வடிவில் கணினிக்கு ஊட்டினால் எதிர்காலத்தில் திருக்குறள் மொழிபெயர்ப்பு உயிரோட்டமானதாகவும், எளிமையாகவும், மூலபாடத்துடன் இயைபுடையதாகவும் அமையும். திருக்குறளை உலகமே போற்றும்.