வேர்களைத்தேடி வழங்கும் பரிசு!!

அன்பின் உறவுகளே..

ஒரு வலைப்பதிவைத் தொடங்குவது மிக எளிது. ஆனால் அதனைத் தொடர்ந்து இற்றைப்படுத்துவது எவ்வளவு கடினம் என்பது இந்த வலையுலகில் இயங்குபவர்களுக்கு நன்றாகத் தெரியும்.

ஒரு வலைப்பதிவு தொடர்ந்து சீராக இயங்கவும்
தகுதியான இடுகைகளை பதிவர் வழங்கவும் துணை நிற்பன தரமான மறுமொழிகளே!

மறுமொழிக்காக என்றுமே நான் இடுகைகள் வெளியிட்டதில்லை.
இருந்தாலும் எனக்கு வந்த மறுமொழிகளே என் எழுத்துக்களைச் செம்மைப்படுத்தின.
தொடர்ந்து தடம் மாறாமல் எழுதச் செய்தன என்பதை என்னால் மறுக்கமுடியாது.


அவ்வடிப்படையில் வேர்களைத்தேடி என்னும் இவ்வலைப்பதிவு தொடர்ந்து சீராக இயங்க மறுமொழியாளர்கள் வழங்கிய கருத்துரைகளே அடிப்படைக் காரணமாகும். நான் வழங்கும் இலக்கிய இடுகைகளைக்கூட ஆழமாகப் படித்து உணர்ந்து நீங்கள் வழங்கிய கருத்துரைகளே இன்று வரை என்னை இவ்வளவு தொலைவு அழைத்து வந்திருக்கிறது.

மறுமொழியாளர்களைப் பலவகைப்படுத்த இயலும்.

1. வருகையைப் பதிவு செய்வோர்.
2. ஒரு சில வரிகளை மட்டும் படித்து மறுமொழியிடுவோர்.
3. ஆழ்ந்து படிப்போர், விவாதிப்போர்.
4. தவறுகளைக் கூட நயமாக உரைப்போர்.
5. நகைச்சுவை உணர்வோடு பதிலளிப்போர்.
6. சிந்தித்து, சிந்திக்க பதிலளிப்போர்
7. தொடர்புடைய செய்திகளை மறுமொழியில் சுட்டுவோர்.
8. நிறைய மறுமொழியிடுவோர்.
9. மறுமொழி வழியே தன் இணைப்புக்கு அழைப்போர்.
10. ஓட்டளித்துவிட்டேன் என்று உறுதிகூறுவோர்

என பலவகைப்பட்ட மறுமொழியாளர்களை இப்பதிவுலகில் காணமுடிகிறது.

என் வலையில் இதுவரை மறுமொழியிட்டவர்களுள் என்னால் மறக்கமுடியாதவர்கள் நிறைய பேர். அவர்களை முடிந்தவரை அடையாளப்படுத்தும் நோக்கில் என் வலையில் மேற்பக்கத்தில் இதுஉங்கள் இடம் என்றொரு பகுதியே ஒதுக்கியுள்ளேன்.

எனக்கு மறுமொழியிட்டவர்களுக்கு என்னால் முடிந்தவரை சென்று மறுமொழியிட்டிருக்கிறேன். அதற்கும் மேலே உங்களுக்கு ஏதாவது செய்யவேண்டும் என்று என் மனம் சொல்லிக்கொண்டே இருக்கிறது. கொடுப்பதில் கிடைக்கும் நிறைவு வேறு எதில் இருக்கிறது.

பணம் இருக்கும் மனிதரிடம் மனம் இருப்பதில்லை
மனம் இருக்கும் மனிதரிடம் பணம் இருப்பதில்லை

என்னிடம் நிறைய மனம் இருக்கிறது அதில் அன்பு மட்டுமே நிறைந்திருக்கிறது. அதனால் அன்பையே விருதாக வழங்க விரும்புகிறேன்.


1.முதலாவதாக இலக்கியத் தேனீ என்னும் விருது.

பழந்தமிழ் இலக்கியங்களானாலும் எம் தமிழ் இலக்கியங்கள் என்ற உரிமையோடு வந்து படித்து தம்மால் முடிந்தவரை புரிந்துகொண்டு மறுமொழியிட்ட பதிவர்களுக்கு இவ்விருதைப் பெருமையோடு வழங்குகிறேன்.

2.இரண்டாவதாக சிந்தனைச் சிற்பி என்னும் விருது.


எந்த இடுகை எழுதினாலும் என் சிந்தனையை உள்வாங்கி, தன் சிந்தனையைப் பதிவு செய்து மறுமொழியிட்ட பதிவர்களுக்கு இவ்விருதை பெருமகிழ்ச்சியுடன் வழங்குகிறேன்.

3. மூன்றாவதாக நகைச்சுவைத் தென்றல் என்னும் விருது.



எத்தகைய இடுகையாக இருந்தாலும் நகைச்சுவையாகப் பதிலளிக்கும் வலைப்பதிவர்களுக்கு சிரித்துக்கொண்டு இவ்விருதை வழங்குகிறேன்.

அன்பின் உறவுகளே...

பழந்தமிழ் இலக்கியங்கள் குறித்த எனது சிறந்த கட்டுரைகளைத் தொகுத்து நூலாக்கம் செய்வது என்று எனக்கு ஒரு எண்ணம் உள்ளது. அச்சூழலில் உங்கள் கருத்துரையோடு வெளியிடவேண்டும் என்பது எனது நீண்ட காலத் திட்டம். பார்ப்போம் காலம் பதில் சொல்லும்.

என் மதிப்பிற்குரிய பதிவர்களே..
இந்த வேர்களைத்தேடி வந்த ஒவ்வொருவரும் இந்த விருதுகளுள் உங்களுக்குப் பிடித்த விருதை உரிமையோடு எடுத்துக்கொள்ளுங்கள்.
நீங்கள் எந்த விருதை எடுத்துக்கொள்கிறீர்கள் என்பதை மட்டும் தெரிவித்தால்.. உங்களை நானும் இவ்வலைக்கு வரும் பிற பதிவர்களும் அடையாளம் கண்டு கொள்ளத் துணையாக இருக்கும் என்று கருதுகிறேன்.

நன்றி.

தங்கள் மேலான பார்வைக்கு.


பொய் என்ற பொருளில்..

1. பொய்சொல்லிகள்
2. இதை நான் எதிர்பார்க்கல
3. உளறிக் கொட்டிய உண்மை
4. நிலவுக்கு வந்த சோதனை

பல இடுகைகள் எழுதியிருந்தாலும் நேற்று “பெரிய பொய்“ என்ற தலைப்பில் எளிய புதிர் ஒன்று வெளியிட்டேன்.

அதற்கு பதிவர்கள் வெளியிட்ட மறுமொழிகளைப் பாருங்கள்.

நான் மறுமொழியாளர்களை வகைப்படுத்தியதன் பொருள் உங்களுக்குப் புரியும்.

வருகை தந்த, பரிசு பெற்ற அனைத்து பதிவர்களுக்கும் மனம் நிறைந்த வாழ்த்துக்களைத் தெரிவித்துக்கொள்கிறேன்.

சிரிக்காதீங்க.!!

புராணச் செய்தி.

இமைய மலையை வில்லாக வளைத்தவனும், கங்கையைத் தலைமேல் கொண்டவனுமான சிவன் உமையம்மையுடன் உயர்ந்த இமைய மலையிலே இருந்தான்...
அப்போது, பத்து தலைகளைக் கொண்டவனான இராவணன் இமைய மலையை எடுப்பதற்காகக் கையை மலையின் கீழே செருகி தொடியழகு பெற்ற தம் கைகளால் தூக்க முயன்றான். சிவன் தம் பெருவிரலால் அழுத்த, இராவணனும் அம்மலையைத் தூக்க இயலாது வருந்தினான்.தம் விரல்கள் மலையில் சிக்கிக் கொள்ள எடுக்கஇயலாது பெருந்துன்பம் கொண்டான்.

நகைச்சுவை.

இராவணன் வருந்தியமைபோல, புலியைப் போல வடிவம் கொண்ட வேங்கைமலர் மிகுதியாக மலர்ந்துள்ளமை கண்ட மதம் கொண்ட யானை, வேங்கை மரத்தின் அடிப்பகுதியைக் குத்தியது. அப்போது அந்த யானையின் தந்தங்கள் வேங்கை மரத்தில் மாட்டிக்கொண்டன. தம் தந்தங்களை எடுக்க இயலாது வருந்திய யானை எழுப்பிய ஒலி நீண்டு உயர்ந்த மலைப்பகுதிகளில் எல்லாம் எதிரொலிக்கும்.

தோழி தலைவனிடம் சொல்கிறாள்..

இத்தகைய மலைநாடனே!

1.உன்னைக் காணாதபோது தலைவி நீரில்லாத நிலம்போலப் பொலிவழிந்து காட்சியளித்தாள்!
அரிய இடம் என்றும் கருதாது நீயும் கொடிய பாம்புகளுக்கும் அஞ்சாதவனாய் அவளைக் காண வந்தாய், அப்போது,
விடியற்காலத்து மழை பெய்ய அந்நிலத்துப் பயிர் போல அழகுபெறத் திகழ்ந்தனள்!

இத்தகைய அழகு இவளை இனி நீங்காதவாறு நிலைபெற்று நிற்கும்படி எதுவும் காக்கும் வழி இருந்தால் நீயே கூறுவாயாக!

2.உன்னைக் காணாதபோது கைப் பொருள் இல்லாதவன் இளமைபோலப் பொலிவழிந்தவளாகக் காட்சியளித்தாள்!

நீயும் இரவுக்கும் வழித்துன்பங்களுக்கும் அஞ்சாது அவளைக் காண வந்தாய்.. அவளும்..
விடியற்காலத்தில் அருள் பெற்றவன் ஆக்கத்தைப் போல அழகு பெற்றுத் திகழ்ந்தாள்!

இவ்வாறு பெற்ற அழகை புறம்கூறும் மாக்களிடமிருந்து காப்பதற்கு உரிய ஒரு பொருள் உண்டெனில் அதை எங்களுக்குத் தெரிவிப்பாயாக..?

3.உன்னைக் காணாதபோது, அறநெறியைப் பின்பற்றாமல் மூப்பினை எய்தியவன் மறுமைச் செல்வத்துக்கு வருந்தி, ஏங்கி நின்றமைபோல இருந்தாள் தலைவி!
நீயோ கொடிய கானவர்களுக்கும் அஞ்சாது அவளைக் வந்து பார்த்தாய்! அதனால் அவளும் செல்வம் நிறைந்தவளாக அழகுபெறத் தோன்றினாள். இவள் இப்பொலிவோடு எப்போதும் தோன்ற அயலார் உரைக்கும் அலருக்கு முடிவுகட்டும் வழியெதுவும் இருந்தால் நீயே சொல்..?

உடன்பாடு

இவ்வாறு தலைவிபடும் துன்பங்களையும், துன்பம் நிறைந்த வழியில் தினம் தலைவன் வருவதையும், அதனால் தலைவி கொள்ளும் துன்பத்தையும் தலைவனுக்கு எடுத்துரைத்தாள் தலைவி. அதனால் மனம் மாறிய தலைவனும் இனியும் காலம் தாழ்த்தாது வேங்கை மலரும் காலத்தில் தலைவியை மணப்பதாக மனம் உடன்பட்டான். இதனை தலைவியிடம் தோழியும் மகிழ்வுடன் தெரிவித்தாள்.
பாடல் இதோ..


இமைய வில் வாங்கிய ஈர்ஞ் சடை அந்தணன்
உமை அமர்ந்து உயர்மலை இருந்தனனாக,
ஐ இரு தலையின் அரக்கர் கோமான்
தொடிப் பொலி தடக் கையின் கீழ் புகுத்து, அம்மலை
எடுக்கல்செல்லாது உழப்பவன் போல 5
உறு புலி உரு ஏய்ப்பப் பூத்த வேங்கையைக்
கறுவு கொண்டு, அதன் முதல் குத்திய மத யானை
நீடு இரு விடர் அகம் சிலம்பக் கூய், தன்
கோடு புய்க்கல்லாது, உழக்கும் நாட! கேள்:
ஆர் இடை என்னாய் நீ அரவு அஞ்சாய் வந்தக்கால், 10
நீர் அற்ற புலமே போல் புல்லென்றாள், வைகறை,
கார் பெற்ற புலமே போல், கவின் பெறும்; அக் கவின்
தீராமல் காப்பது ஓர் திறன் உண்டேல், உரைத்தைக்காண்;
இருள் இடை என்னாய் நீ இரவு அஞ்சாய் வந்தக்கால்,
பொருளில்லான் இளமை போல் புல்லென்றாள், வைகறை, 15
அருள் வல்லான் ஆக்கம் போல் அணி பெறும்; அவ் அணி
தெருளாமல் காப்பது ஓர் திறன் உண்டேல், உரைத்தைக்காண்;
மறம் திருந்தார் என்னாய் நீ மலையிடை வந்தக்கால்,
அறம் சாரான் மூப்பே போல் அழிதக்காள், வைகறை,
திறம் சேர்ந்தான் ஆக்கம் போல் திருத்தகும்; அத் திருப் 20
புறங்கூற்றுத் தீர்ப்பது ஓர் பொருள் உண்டேல், உரைத்தைக்காண்;
என ஆங்கு,
நின் உறு விழுமம் கூறக் கேட்டு,
வருமே, தோழி! நல் மலை நாடன்
வேங்கை விரிவு இடம் நோக்கி, 25
வீங்கு இறைப் பணைத் தோள் வரைந்தனன் கொளற்கே.

கலித்தொகை -38

(இரவுக்குறி வந்து நீங்கும் தலைவனை எதிர்ப்பட்டு, தோழி தலைவியது நிலைமை கூறி,அவனை வரைவு கடாவ, அவன் வரை வருகின்றமை அறிந்த தோழி தலைவிக்கு வரைவு மலிந்து கூறியது)

தலைவியைச் சந்திப்பதற்காகத் தலைவன் இரவில் வந்து செல்கிறான். அப்போது தோழி, தலைவனை எதிரே கண்டு, தலைவியது நிலை பற்றி அவனிடம் கூறி விரைவில் அவளைத் திருமணம் செய்துகொள் என்று அறிவுறுத்தினாள். அவனும் திருமணம் செய்து கொள்ள உடன்பட்டான். அதனைத் தோழி தலைவியிடம் தெரிவிக்கிறாள்.

பாடல் வழியே..


1.தலைவன் திருமணத்துக்கு உடன்படுதல் (வரைவு மலிதல்) என்னும் அகத்துறை விளக்கப்படுகிறது.

2.சிவன் - இராவணன் குறித்த புராணச் செய்தியை அறிந்துகொள்ள முடிகிறது.

3.நீரற்ற நிலம்போல
மழை பெற்ற புலம் போல

கைப் பொருள் இல்லாதவன் இளமைபோல
செல்வச் செழிப்புமிக்கவன் அழகுபோல

அறநெறியைப் பின்பற்றாதவன் மூப்பினைப்போல
செல்வப் பொலிவு கொண்டவன் போல

போன்ற தலைவியின் நிலைய உரைக்கும் உவமைகள் அழகுடையவனாகவும், மீண்டும் மீண்டும் படிக்கத் தூண்டும் இன்பம் பயப்பனவாகவும உள்ளன.

4.புலியெனக் கருதிய யானை வேங்கை மரத்தைத் தாக்கித் தன் தந்தங்கள் சிக்கிக்கொள்ள வருந்தும் காட்சி படிப்போர் மனதில் பேதமை காரணமாக சிரிப்பை வரவழைக்கிறது.

5.குறிஞ்சி நில மக்கள் வேங்கை மலரும் காலத்தை திருமணம் செய்யும் காலமாகக் கொண்டிருந்தனர் என்னும் சங்ககால வழக்கத்தையும் இப்பாடல் வழியே அறியமுடிகிறது.


யானையின் செயலும்
தலைவியின் நிலையும் சிரிப்பை வரவழைப்பதாகவே இருந்தாலும்.

இரு உயிர்களும் படும் துன்பம் மனதை வருத்தம் கொள்ளச் செய்வதாகவே உள்ளது.

பெரிய பொய்!

ஒரு நாட்டை அரசன் ஒருவன் ஆண்டு வந்தான் அவனுக்குக் கதைகள் கேட்பதில் ஆர்வம் மிகுதி.

ஒரு சமயம் அவன் அமைச்சர்களுடன் பேசிக்கொண்டிருந்தான்.

“நம் நாட்டில் யார் பெரிய பொய் சொல்வார்கள்?“ என்று கேட்டான்.

“பெரும்பாலோர் பொய் பேசுபவர்கள் தாம். யாரால் பெரிய பொய் சொல்ல முடியும் என்று தெரியவில்லை“ என்றார்கள் அமைச்சர்கள்.

முரசு அடிப்பவனை அழைத்த அரசன் “ நாளை அரண்மனையில் அரசர் முன்னிலையில் போட்டி நிகழும். யார் பெரிய பொய் சொல்கின்றார்களோ அவர்களுக்கு ஆயிரம் பொற்காசுகள் பரிசளிக்கப்படும் என்று தெரிவி“ என்றான்

அப்படியே நாடெங்கும் முரசு அடித்துத் தெரிவித்தான் அவன்.

பொய் சொல்லிப் பரிசு பெற நான்கு பேர் அரண்மனைக்கு வந்தனர்.

அரசன் அரியணையில் அமர்ந்திருந்தான்.

1.முதலாமவன் தன் பொய் மூட்டையை அவிழ்த்தான். “அரசே! விநோதமான சோள விதை என்னிடம் கிடைத்தது அதை வயலில் நட்டுவிட்டுத் திரும்பினேன். கணநேரத்தில் பெரிய சோளச் செடியாக வளர்ந்திருந்தது அது.
சோளக் கதிர்களை பறிக்க அதில் ஏறினேன்.
சோளச் செடி நொடிக்கு நொடி வளர்ந்து கொண்டே இருந்ததால் என்னால் இறங்க முடியவில்லை.
சிறிது நேரத்தில் கண்ணுக்கு எட்டாத உயரம் சென்றுவிட்டேன்.
பசி தாங்கமுடியாத நான் சோளச் செடியில் அமரவந்த பருந்து ஒன்றைக் கெட்டியாகப் பிடித்துக்கொண்டேன்.
பயந்துபோன பருந்து என்னைத் தரையில் இறக்கிவிட்டது“

என்று பொய் சொன்னான்.

இதைக் கேட்ட எல்லோரும் “இது பெரிய பொய்தான்“ என்றார்கள்.

2. இரண்டாவதாக வந்தவன் “ அரசே! நான் தெரியாமல் இந்தக் கூட்டத்தில் சேர்ந்துவிட்டேன். எனக்குப் பொய்யே பேசத்தெரியாது. என்னை விட்டுவிடுங்கள்“ என்றான்.
“சரி! உன்னை மன்னித்தேன். இனி இப்படி உனக்குத் தெரியாத துறையில் இறங்காதே“ என்றான் அரசன்.

3. மூன்றாமவன் “ அரசே! என்தாய்க்கும் என்தந்தைக்கும் திருமணம் நடந்தது. அந்தத் திருமண வேலைகளையெல்லாம் என் பொறுப்பி்ல் தான் விட்டிருந்தனர்“ என்று தொடங்கினான்.

அவையோர் “இவன் பொய்க்கு அளவே இல்லை“ என்று சிரிக்கத் தொடங்கினர். “இதுவும் நல்லபொய்தான்“ என்றான் அரசன்.

4. நான்காவதாக வந்தவன், “அரசே! என்தாயின் வயிற்றில் நான் இரண்டுமாதக் குழந்தையாக இருந்தேன். அப்போது என் தாய் ஆற்றில் குளித்துக்கொண்டிருந்தாள். அவளை விழுங்க பெரிய திமிங்கிலம் ஒன்று வந்தது. என்தாய்க்கு நேர இருந்த ஆபத்தைக் கண்டு அவள் வயிற்றிலிருந்து வெளியே வந்தேன். அந்தத் திமிங்கிலத்தோடு கடுமையாகச் சண்டை செய்து அதைக் கொன்றேன். பிறகு திரும்ப என் தாயின் வயிற்றுக்குள் சேர்ந்துவிட்டேன்.“ என்று பொய் சொன்னான்.

அவர்களில் ஒருவனுக்கு அரசன் பரிசளித்தான்.
அரசன் யாருக்குப் பரிசளித்திருப்பான்.????


என்ன நண்பர்களே..
நம்ம அரசியல்வாதிகளையும், வழக்குரைஞர்களையும் விட்டால் இதைவிடப் பெரிய பொய்யே சொல்வார்கள் என்று தோன்றுகிறதா..

மேற்கண்ட புதிருக்கான பதிலைக் கருத்துரையில் தெரிவியுங்கள் பார்க்கலாம். சரியான பதிலளித்தால் தங்கள் மூளை நல்ல நிலையில் இயங்குகிறது என்று நீங்களே உங்களுக்கு ஒரு பாராட்டுத் தெரிவித்துக்கொள்ளலாம்.

மாலை 6 மணிக்கு இதற்கான சரியான பதிலை இப்பதிவிலேயே வெளியிடுகிறேன் அன்பர்களே.


புதிருக்கான சரியான பதில்..


அன்பின் நண்பர்களே காலையில் கேட்ட புதிருக்கு நிறைய பேர் சரியான பதிலளித்திருந்தீர்கள்.

மிக்க மகிழ்ச்சி.

நீங்கள் சொன்னது போல..

2. இரண்டாவதாக வந்தவன் “ அரசே! நான் தெரியாமல் இந்தக் கூட்டத்தில் சேர்ந்துவிட்டேன். எனக்குப் பொய்யே பேசத்தெரியாது. என்னை விட்டுவிடுங்கள்“ என்றான்.
இதுதான் சரியான பதில்.

இப்படித்தான் வகுப்பில் ஒருமுறை பொய் பற்றிப் பேசிக்கொண்டிருக்கும்போது...

நாம் எல்லோருமே பொய் சொல்பவர்கள்தான்.
நாம் சொல்லக்கூடிய பொய் ஒன்றுக்கு ஒருபல் விழுவதாக இருந்தால்
உலகத்தில் யாருக்குமே பல் இருக்காது என்றேன்...

அதற்கு ஒரு மாணவர் பல் மட்டுமல்ல யாருக்கும் வாயே இருக்காது ஐயா என்றார்.

அன்பின் உறவுகளே சரியான பதிலளித்த ஒவ்வொருவருக்கும் மனம் நிறைந்த பாராட்டுக்களைத் தெரிவித்துக்கொள்கிறேன்.

தவறான, வேறுபட்ட, எதிர்பாராத,நகைச்சுவையுணர்வுடன் பதிலளித்த அன்பர்களுக்கும் நன்றிகளையும் முயற்சித்தமைக்குப் பாராட்டுக்களையும் தெரிவித்துக்கொள்கிறேன்.

நண்பர்களே இந்தப் புதிரைவிட நீங்கள் தந்த கருத்துரைகள் மிகவும் விரும்பத்தக்கதாக அமைந்தன.

நன்றி!

மிதக்கும் தலைப்புகள்.

வலையுலகில் ஒவ்வொரு நாளும் பல பாடங்களைக் கற்று வருகிறேன். சில வலைப்பதிவுகளைக் காணும்போது அவர்கள் “மிதக்கும் தலைப்புகளை“ வைத்திருப்பார்கள். அவர்கள் எப்படி இதனைச் சேர்த்திருப்பார்கள் என்று பல நாள் சிந்தித்திருக்கிறேன்.

இன்றுதான் அதன் நுட்பத்தை அறிந்தேன். என்னைப் போல சிலருக்காவது இந்த வசதி பயன்படும் என்ற எண்ணத்தில் இவ்வழிமுறையைப் பகிர்ந்து கொள்கிறேன்.

1. உங்கள் ப்ளாக்கர் கணக்கிற்குள் நுழைந்துகொள்ளுங்கள்.

2. டாசுபோர்டு சென்று லேயவுட் என்னும் வடிவமைப்புக்குச் செல்லுங்கள்

3. கேட்கட்டைச் சேர் என்னும் பகுதியில் உள்ள தேடல் பெட்டியில் Alex Dioso அல்லது Label Sphere என்று தட்டச்சிட்டுத் தேடுங்கள்.

4. தேடலில் கிடைக்கும் பெட்டியைதங்கள் வலைப்பக்கத்தில் சேர்த்துக்கொள்ளுங்கள்.

5. பின் அந்தப் பெட்டியை உங்கள் வலைப்பக்கத்தில் எங்குவேண்டுமானாலும் மாற்றிக்கொள்ளலாம்.

6. மேகங்கள் போல இதுவரை நீ்ங்கள் பகுத்துவைத்திருக்கும் உட்தலைப்புகள் மிதப்பதை இப்போது நீங்கள் காணமுடியும்.

7. இதன் அளவுகளைக் கூட நீங்கள் தேவையான அளவில் மாற்றிக்கொள்ள முடியும்.

8. மேலும் இதுதொடர்பான விளக்கங்களைப் பெற இந்த இணையபக்கத்துக்குச் செல்லுங்கள்.

9. இதில் எனக்குப் பிடித்த நுட்பம் என்னவென்றால் இந்த வசதி தமிழ் வலைப்பதிவுகளுக்கும் பொருந்துகிறது என்பதுதான்.

10. இந்த வசதியை முன்பு ஒருமுறை வேறு வழியில் நான் முயற்சித்தபோது ஆங்கில வார்த்தைகளை மட்டுமே ஏற்று, தமிழ்ச் சொற்களை ஏற்காத தன்மையை உணர்ந்திருக்கிறேன். அவ்வகையில் இவ்வசதி பலருக்கும் பிடிக்கும் என்று கருதுகிறேன்.

காலம் x மனிதன் = வரலாறு.

காலம் எங்கோ தொடங்கி எங்கோ சென்று கொண்டிருக்கிறது.இடையில் வந்த நாம் அதற்கு ஆண்டு, மாதம், வாரம், நாள், மணி, நொடி, கடந்தகாலம், நிகழ்காலம், எதிர்காலம் என ஏதேதோ பெயர் சொல்லி அழைக்கிறோம்.

ஆன்மீகமும், அறிவியலும் விளக்கமுடியாத புள்ளியில் மையம் கொண்டிருக்கிறது காலம்.

காலத்தைப் புரிந்துகொள்வது அவ்வளவு சுலபமானதல்ல.

காலத்தைப் புரிந்துகொள்ளாதவர்களுக்கு காலம் முதலாளியாக இருக்கிறது!
காலத்தைப் புரிந்துகொண்டவர்களுக்குக் காலம் நல்ல பணியாளாக இருக்கிது!

காலத்தைப் புரிந்துகொள்ளாதபோது..

காலத்தின் கையில் குழந்தையாய் நாம்
நமது கையில் பொம்மையாய் காலம்!

அழகிய குளத்தில் தாமரையாய் காலம்
தாமரைக் குளத்தில் தவளையாய் நாம்!

குப்பைக்கு நடுவே புதையலாய் காலம்
புதையலை மூடிய குப்பையாய் நாம்!

விதையுள் மறைந்த மரமாய் காலம்
மரத்தை வெட்டும் கருவியாய் நாம்!

இசையின் நடுவே மௌனமாய் காலம்
ஓசையை கேட்கும் பேதையாய் நாம்!

காலத்தைப் புரிந்துகொண்டபோது...

ஆழமான கடலாய் காலம்
கடலை கடக்கும் கப்பலாய் நாம்!

உயரமான வானமாய் காலம்
பறந்து திரியும் பறவையாய் நாம்!

புல்லாங்குழலின் துளைகளாய் காலம்
அதில் காற்றை நுழைக்கும் மேதையாய் நாம்!

பாலையில் தோன்றும் கானல்நீராய் காலம்
மண்ணைக் குளிரச் செய்யும் மழைத்துளியாய் நாம்!

கல்லுள் மறைந்த சிற்பமாய் காலம்
கல்லைச் செதுக்கும் சிற்பியாய் நாம்!

“காலம் எல்லோருக்கும் பொதுவாகத்தான் உள்ளது.
அதைப் பயன்படுத்திக்கொள்பவர்கள் தான் வேறுபட்டவர்களாக உள்ளார்கள்.

காலத்தைப் புரிந்து கொள்ளாதவர்கள் வரலாறு படிக்கிறார்கள்!காலத்தைப் புரிந்து கொண்டவர்கள் வரலாறு படைக்கிறார்கள்!!

செல்வந்தர்களே.... கேளுங்கள்!!!

செல்வந்தர் யார்?
செல்வம் நிறைந்தவரெல்லாம் செல்வந்தராகமுடியாது!
நல்ல நட்புகளும், உறவுகளும் நிறைந்தவர் மட்டுமே செல்வந்தராக முடியும்!

காலந்தோறும் செல்வம்.

1. குழந்தைச் செல்வம்!
2. நோயற்ற வாழ்வே குறைவற்ற செல்வம்!
3. கல்வியே அழியாத செல்வம்!
4. ஆடு, மாடுகளே செல்வம்!
5. நிலங்களே செல்வம்!
6. பணம் தான் செல்வம்!
என காலந்தோறும் செல்வத்தின் மதிப்பு மாறிக்கொண்டேதான் இருக்கிறது.

ஆசை.
வாழ்ககையி்ல் பொருட் செல்வம் கிடைக்காதவர்கள், செல்வத்தின் மீது ஆசை கொண்டவர்கள் தம் பி்ள்ளைகளுக்கு பெயரிலாவது செல்வம் இருக்கட்டுமே என்று...
செல்வம், அருள் செல்வம்,அன்புச் செல்வம், அறிவுச் செல்வம், ஞானச் செல்வம், செல்வமுரளி, செல்வ கணபதி, செல்வி என்றெல்லாம் பெயர் வைப்பதை வழக்கில் காணமுடிகிறது.

செல்வத்தை எங்கு மறைத்து வைப்பீர்கள்..?

இன்றைய சூழலில் ஊடகங்களில் கேட்கும் தினசரி செய்திகளுள்,
அலைக்கற்றை மோசடி,கறுப்புப் பணம், இலஞ்சம், ஊழல், சுவிசு வங்கி, லோக்பால், போராட்டம், பத்மநாதசாமி, சாய்பாபா என்பன குறிப்பிடத்தக்கனவாக உள்ளன. இந்த செய்திகளுக்கான தலைப்புகள் பலவகைப்பட்டிருந்தாலும், பொருள் ஒன்றுதான்....
“செல்வத்தை மறைத்தல்“ என்பதுதான் அது.
அட மூடர்களே செல்வத்தை எங்கே மறைப்பீர்கள்..?
முழு பூசணிக்காயை சோற்றுக்குள் மறைக்கப் பார்க்கிறீர்களே முடியுமா..??

சரி மறைத்தாலும் உங்க உடல் மறைந்தபின் அதை உங்களால் எடுத்தச் செல்ல இயலுமா..??

சங்க இலக்கியத்தில் ஒரு அகப்பாடல்.....

தலைவன், தலைவியைத் திருமணம் செய்து கொள்ளாது காலம் தாழ்த்தி வருகிறான். தோழி தலைவனிடம் வாழ்வியல் நீதிகளை எடுத்துரைத்துத் தலைவியைத் தலைவன் மணம் செய்து கொள்ளத் தூண்டுகிறாள். இதுவே பாடலுக்கான களம்.

நெய்தல் நிலப் போர்களம்!

கடற்கறையில் வரிசையாக நிறுத்தப்பட்ட படகுகளே யானைப் படையாக!
அலைகளின் ஒலியே போரில் முழக்கப்படும் பறையொலியாக!
மீன்களுக்காகத் தவமிருக்கும் பறவை இனங்களே படையாகவும் கொண்டு அரசன் பகைவன் மேல் போர்தொடுத்து செல்லுவதைப் போல் வலிய கடலைச் சேர்ந்த நிலத்தை உடையவனே!!

நன்றி மறந்தவன் செல்வம்!

தனக்குக் கற்பித்த ஆசிரியன் துன்பப்படும் சூழலில் அவருக்குத் தன் கைப்பொருளைக் கொடுத்து உதவாதவனுடைய செல்வம்...?

நெறிமுறை மறந்தவன் செல்வம்!

தான் கற்ற வி்த்தையைத் தவறான வழியில் பயன்படுத்தியவனுடைய செல்வம்...?

உதவியை மறந்தவன் செல்வம்!

தான் துன்புற்றபோது தனக்கு உதவி செய்தவர் தாம் துன்புறும் போது உதவாதவனுடைய செல்வம்....?

ஆகிய இவையெல்லாம் தாமாகவே தேய்ந்து அழிந்து போகக் கூடியவை. அதுமட்டுமின்றி செய்நன்றி மறந்தவர் உடலைவிட்டு உயிர் பிரிந்தாலும் தாம் செய்த தவறுக்கான துன்பத்தை எவ்வழியிலாவது அடைவது உறுதி!!

உறவுகளை வருத்தும் செல்வம்!

உறவினர்கள் மனம் வருந்தும் படியாகத் தேடிக் குவித்த செல்வங்கள் எல்லாம் முயற்சியில்லாத மன்னனின் குடிகள் எவ்வாறு அழியுமோ அதுபோல அழிந்துபோகும்.

வாக்குத் தவறியவன்!

கொடுத்த வாக்கைக் காப்பாற்றாதவன் தானாகவே தேய்ந்துபோவான். பொய்த்த இந்தத் தீவினையானது மறுபிறப்பிலும் வாளைப்போலக் கூர்மையாக அவனை அழிக்காமல் விடாது.

ஒப்பிட்டுத் தன்மதிப்பீடு செய்துகொள்.

தலைவ..
செய்நன்றிக் கேடும், வாக்குத் தவறுதலும் எத்தகைய அழிவுக்கு வழிவகுக்கும் என்பதை இதுவரை நான் சொன்னதிலிருந்து உன்னால் உணரமுடிகிறதா..? களவுக்காலத்தில் தலைவியைக் காண நீ என்ன பாடுபட்டாய் ? அந்த நன்றியை மறக்கலாமா? தலைவியை விரைவில் மணப்பேன் என்ற வாக்குத் தவறுதல் சரியா..?

வரைவு கடாவுதல்.

தன் பகை வேந்தனோடு சினந்த அரசன், பகை வேந்தன் தம் கோட்டையை முற்றுகையிட்டபோது எத்தகைய வருத்தம் கொள்வானோ அதுபோலத் தலைவியும் உன் வரைவுக்காக் (திருமணம்) காத்திருக்கிறாள். அதனால் விரைந்து தலைவியை மணப்பாய் தலைவ! என்கிறாள் தோழி.

பாடல் இதோ..

நிரை திமில் களிறாக, திரை ஒலி பறையாக,
கரை சேர் புள்ளினத்து அம் சிறை படையாக,
அரைசு கால் கிளர்ந்தன்ன உரவு நீர்ச் சேர்ப்ப! கேள்:
கற்பித்தான் நெஞ்சு அழுங்கப் பகர்ந்து உண்ணான், விச்சைக்கண்
தப்பித்தான் பொருளேபோல், தமியவே தேயுமால், 5
ஒற்கத்துள் உதவியார்க்கு உதவாதான்; மற்று அவன்
எச்சத்துள் ஆயினும், அஃது எறியாது விடாதே காண்;
கேளிர்கள் நெஞ்சு அழுங்கக் கெழுவுற்ற செல்வங்கள்
தாள் இலான் குடியே போல், தமியவே தேயுமால்,
சூள் வாய்த்த மனத்தவன் வினை பொய்ப்பின்; மற்று அவன் 10
வாள் வாய் நன்று ஆயினும், அஃது எறியாது விடாதே காண்;
ஆங்கு
அனைத்து, இனி பெரும! அதன் நிலை; நினைத்துக் காண்:
சினைஇய வேந்தன் எயிற்புறத்து இறுத்த
வினை வரு பருவரல் போல, 15
துனை வரு நெஞ்சமொடு வருந்தினள் பெரிதே.

கலித்தொகை -149.
வரைவு நீட்டித்துழித் தலைவியது ஆற்றாமை கூறித் தலைவனை வரைவு காடாயது.

பாடல் வழியே..

1. ஒரு அகப்பாடலில் தலைவனின் நிலப்பகுதியைச் சொல்லவந்த தலைவி கடலே போர்க்களமாக, படகுகளே யானைப்படையாக, அலையே பறையாக, பறவையினங்களே படையாகக் கற்பனை செய்து காட்சிப்படுத்தியமை இயற்கையோடு இயைந்த அவர்தம் வாழ்க்கைக்குச் சான்றாகத் திகழ்கிறது.

2. செய்நன்றி மறத்தல், வாக்குத் தவறுதல் உள்ளிட்ட தவறுகளைச் சுட்டி தலைவனை உணரவைக்க எண்ணிய தோழி சொல்லும் பல்வேறு நீதிகருத்துக்கள், இன்றும் நம் வாழ்வி்ல் பின்பற்றத் தக்கனவாகவே உள்ளன.

3. செல்வம் நிலையில்லாதது, அழிந்துபோகக்கூடியது, மறைத்து வைக்கமுடியாதது என்ற தோழியின் கூற்று ஒவ்வொருவரும் தம் வாழ்வில் சிந்திக்க வேண்டியதாக உள்ளது.