தாய் மொழிக்கல்வி (தமிழ்) இன்றைய நிலை

உலகம் பரவிய தமிழர்கள் ஐம்பத்தாறு நாடுகளில் வாழ்கின்றனர் .உலகெங்கும் வாழும் மனிதர்களுள் நூற்றுக்கு ஒருவர் தமிழராவர் .தமிழ் மொழியோ கல் தோன்றி மண் தோன்றா காலத்தே முன் தோன்றியது .நாகரீகம் ,பண்பாடு என பல கூறுகளை உள்ளடக்கிய இலக்கிய செழுமை கொண்டது .செம்மொழி என்னும் தரத்தையும் பெற்றுவிட்டது .இன்னும் பல்வேறு சிறப்புகளையும் கொண்ட தமிழ் மொழியின் இன்றைய சமூக மதிப்பீடு குறித்து ஆய்வதாக இக்கட்டுரை அமைகிறது

தாய் மொழிக் கல்வியின் தேவை


குசராத் கல்வி மாநாட்டில் காந்தியடிகள் ஆற்றிய சொற்பொழிவில் "கல்வி மொழி தாய்மொழியாக இருக்க வேண்டும் .தாய் மொழி தனக்குரிய இடத்தைப்பெற்றுவிட்டால் நமது மூளைக்கும் இன்னும் தேவையான அறிவைப் பெறுதற்கு வசதியாக விடுதலை கிடைக்கும் "என்றார் .

"கண்டம் பாயும் ஒரு ஏவுகணை தயாரிக்க ஆகும் பணத்தில் மூன்றரை லட்சம் ஆரம்பப் பள்ளிகள் கட்டமுடியும்
."என்று முன்னால் இந்திராகாந்தி நாடளுமன்றதிலே அறிவித்தார் .தாய்மொழி நன்கு கற்றால் அது நல்ல அடித்தளமாகிறது தாய் மொழி மூலம் ஒன்றைக் கற்பது எளிதாகிறது .

"தாய் மொழியைப் போற்றி வீழ்ந்த நாடும் இல்லை

தாய் மொழியைப் புறக்கணித்து வாழ்ந்த நாடும் இல்லை "


என்பது உலகறிந்த உண்மை..

கருவில் உள்ள குழந்தை ஏழு மாதத்திலேயே மூளை முதிர்ச்சி பெற்று வெளி ஒலிகளைக் கேட்கிறது .என்கின்றனர் மருத்துவ அறிஞர்கள் .குழந்தை வளரும் சூழல் மொழித் தாக்கத்திற்கு அடிப்படையாக அமைகிறது. இன்றைய குழந்தைகள் கேட்கும் ஒலிகளும் ,சூழல்களும் அவர்களுக்கு தமிழை அன்னியமாக்கிவிடுகின்றன .அவர்கள் தாய் மொழியும் தெளிவின்றி ,பிற மொழியும் புரியாமல் தவிக்கின்றனர்.

தாய் மொழி மூலமாகவே ஒருவர் தான் கூற விரும்பும் கருத்தை தெளிவாகவும் ,முழுமையாகவும் ,ஆழமாகவும் தெரிவிக்க முடியும் என்கின்றனர் உளவியலாளர்கள் .

இன்றைய சூழலில் தாய் மொழிக் கல்வி

அறிவுச்சுடர் என்ற மாணவி தனக்கு ஆங்கிலம் தெரியவில்லை என வருந்தி தற்கொலை செய்து கொண்டார் ."


தேனி பண்ணைப் புரத்தைச் சேர்ந்த விது என்ற மாணவன் ஆங்கிலம் தெரியாததால் தூக்கிட்டு தற்கொலை செய்து கொண்டார் .பன்னிரண்டாம் வகுப்புத்தேர்வில் ஆயிரத்து இருபத்துமூன்று மதிப்பெண் பெற்ற இவர் தாய் மொழியான தமிழ் வழி பயின்றதால் ஆங்கிலம் புரியவில்லை .ஐந்து பாடங்களில் தோல்வியுற்றதால் தற்கொலை செய்துகொண்டார்.

இவையெல்லாம் இணையத்தில் கிடைத்த உண்மைச் செய்திகள்.


இதுவே இன்றைய சூழழில் தாய்மொழிக் கல்வியின் நிலை .இதனை ,

டெல்லி வழி இந்தி"
பள்ளி வழி ஆங்கிலம்
இறைவன் வழி சமஸ்கிருதம்
இசையின் வழி தெலுங்கு"


என இயம்புவர் தணிகைச் செல்வன்.

இரண்டாயிரமாவது ஆண்டு இரண்டாயிரம் பள்ளிகளாக இருந்த மெட்ரிக் பள்ளிகள் இன்று திசையெல்லாம் காட்சியளிகின்றன .இப்பள்ளிகள் பல தலைமுறைகளாக குழந்தைகளுக்கு தாய்மொழி கற்றுக் கொடுப்பதில்லை .ஏழை குழந்தைகள் இங்கு படிக்க முடியாத அளவுக்கு கட்டணம் பெறுகின்றன.அதனால் ஏழைக் குழந்தைகள் தரமான கல்வி பெற இயலாமல் தவிக்கின்றனர் .அதனால் அரசுப்பள்ளிகளை நாடுகின்றனர் .அரசுப்பளிகள் தலைமையாசிரியர் இல்லாமலும் ,போதிய வசதி இல்லாமலும் ஆசிரியர் பற்றாக் குறையோடும் இயங்கும் நிலை உள்ளது .இது அரசுப் பள்ளிகள் தரமான கல்வி கொடுக்க முடியாத சூழலை உருவாக்குகிறது .மத்திய மாநில அரசுகள் கல்வியில் பல மாற்றங்களை செய்ய வேண்டும் .குறிப்பாக தமிழக அரசு கல்வி நிலை குறித்து ஆய்வு செய்து உரிய நடவடிக்கை எடுக்காவிட்டால் எதிர்காலத் தலைமுறையின் வளர்ச்சி பாதிக்கப்படும் .

தாய்மொழிகளின் தேவையை அறிந்த ஐ.நா.இரண்டாயிரமாவது ஆண்டு முதல் ஒவ்வோர் ஆண்டிலும் பிப்ரவரி இருபத்து ஒன்றாம் நாளை "உலக தாய் மொழி நாளாக "அறிவித்துள்ளது.இந்த நிலையில் இரண்டாயிரத்து எட்டாம் ஆண்டை "உலக தாய் மொழிகளின் ஆண்டாகவே"அறிவித்துள்ளது .

ஐ.நா.வின் உறுப்பு நிறுவனமான யுனச்கொவின் தலைமை இயக்குனர் ,கோய்ச்சிரோ கூறும் செய்தி அச்சமூட்டுவதாக உள்ளது.

"இப்போது பேச்சு வழக்கில் உள்ள ஏழாயிரம் மொழிகளில் சரிபாதி அடுத்த சில தலை முறைகளிலே காணாமல் மறைந்துவிடும்."

ஒரு இனத்தை அடையாளப்படுத்தி அதன் பண்பாடு நாகரீகம் போன்ற பல கூறுகளையும் அடுத்த தலை முறைக்கு எடுத்துச் செல்வது மொழியாகும்.அதனால் தாய்மொழியின் தேவையை அனைவரும் உணர்ந்து செயல்படவேண்டும்.

தீர்வுகள்

தாய்மொழி வழியில் கல்வி கற்பிக்கப்பட வேண்டும்.தாய்மொழியான தமிழ் வழி பயில்வோருக்கு தேவையான பாடத்திட்டங்களை தமிழ்ப்படுத்த வேண்டும்.அதற்கு அறிவியல் தமிழ் எனும் துறை வளர அரசு ஊக்கமளிக்க வேண்டும்.

தமிழ் நாட்டில் தாய்மொழி தெரிந்தவர்கள் முழுமையான கல்வி பெற இயலாத சூழலை அரசு உணரவேண்டும்.

ஆங்கிலம் தெரியாததால் தமிழ் படித்தவர்கள் தாழ்வு மனப்பான்மை கொண்டு தற்கொலை செய்து கொள்வதை அரசு அறிந்து அவர்களும் வாழ வழி செய்யவேண்டும்.

எதிர் காலத் தலை முறையினருக்காவது தாய்மொழி வழியில் பள்ளி முதல் பல்கலைக்கழகம் வரைப் பயில வகை செய்ய வேண்டும்.

தாய்மொழிக்கல்வி நல்ல அடித் தளமானால் அதன்மூலம் பல மொழிகளையும் எளிமையாக அறிந்துகொள்ளலாம் .கருத்தை தெளிவாக ,ஆழமாக, விரிவாக எடுத்தியம்ப அது உதவும்.

வணிக மயமான கல்வி நிறுவங்களை கண்டு அரசு வரைமுறைப்படுத்த வேண்டும்.
தாய்மொழி(தமிழ்)வழிக் கல்வி பயின்றோர் சமூகத்தில் மதிப்போடு வாழும் நிலையை அரசு உருவாக்க வேண்டும்பணிகளில் தாய் மொழி வழி கற்போருக்கு அரசு முன்னுரிமை தரவேண்டும் .
கல்வி கற்கும் மாணவர்களின் சுமையைக் குறைத்து ,அவர்கள் சுயமாக ,சுதந்திரமாக சிந்திக்க வாய்ப்பளிக்க வேண்டும் .

பாரதிதாசன் உள்ளிட்ட பல்கலைக்கழகங்கள்,பல அறிவியல்த் துறைகளையும் தாய்மொழி வழியே படிக்கவும், வினாத்தாள்களில் வினாக்கள் தமிழிலும் கேட்கப்படுவது வரவேற்கத்தக்க ஒன்றாக உள்ளது.

மொழி என்பது ஒரு தகவல்த் தொடர்பு சாதனம் மட்டுமல்ல ஒரு பண்பாட்டின், ஒரு இனத்தின் அடையாளம் என்பதை யாவரும் உணர்ந்தாலேயே தாய்மொழியை அழிவிலிருந்து காக்கலாம்.

மடலின் படிநிலைகள்

முனைவர்.இரா.குணசீலன் .
தமிழ் விரிவுரையாளர் .
கே.எஸ் .ஆர் கலை அறிவியல் கல்லூரி .
திருச்செங்கோடு நாமக்கல்மாவட்டம் .
மடலின் படிநிலைகள்
முன்னுரை .
இலக்கியங்கள் மக்களின் வாழ்வியலை இயம்புவன .மனித வாழ்வில் காதல் அடிப்படையானது .காதல் நிறைவடையவிட்டால் இன்றும் காதலர் மனம் சாதலையே விரும்புகிறது .இவ்வுணர்வை இலக்கியங்கள் அகப்பொருளில் உரைக்கின்றன.அகத்துறைகளுள் ஒன்றான மடல் காதலின் முதிர்ந்த நிலையினது .அதனால் தான் இது பெருந் திணைக்கு உரியதாக உரைக்கப்படுகிறது .காதலும் சாதலும் எக்காலத்தும் யார் மாட்டும் நிகழ்வதாகும் .இந்த நிகழ்வுக்கும் மடல் என்ற அகத் துறைக்குமான தொடர்பை இயம்புவதாக இக்கட்டுரை அமைகிறது .
மடலின் இலக்கணம்
மடல் என்ற சொல் பனங்கருக்கு, பனைமடல் ஆகிய பொருள்களில் இலக்கியங்களில் பயின்று வருகின்றது .இதனை ,
"மடல்மா கூறும் இடனுமார் உண்டே" . என்பர் தொல்காப்பியர்.மேலும் காதல் பெருகிய நிலையில் காதலியைப் பெரும் கடைசி முயற்சியாக தலைவன் நாணத்தை விட்டு மடல் ஏறி ஊர் மன்றுக்கு வருவான் .இதனை ஏறியமடல் திறம் என்பர் தொல்காப்பியர் .பெண்கள் எந்த திணையிலும் மடல் ஏறுவது இல்லை .அது பொற்புடைய நெறி அன்று .என்பது தொல்காப்பியர் கருத்து .
மடல் மா பெண்டிர் ஏறார் ஏறுவர்
கடவுளர் தலைவராய் வருங்காலை (பன்னிரு பாட்டியல் ௧௪௭)
என இலக்கணம் வகுக்கப் பட்டுள்ளது .புறப்பொருள் வெண்பா மாலை மடலூர்தலை ஆண் பெண் என இரு பாலருக்கும் பொதுமைப் படுத்துகிறது .மடல் ஏறியும் காதலி கிடைக்காத நிலையில் 'வரை பாய்தல் 'என்ற தற்கொலை முயற்சி அமைவதை "ஒருவன் ஒருத்தியிடம் கழி காமத்தனாகி அவளை அடையப்பெறாது மடல் ஏறி ,வரை பாய்ந்து தன் உயிரை மாய்த்துக் கொள்ளுதல் உண்டு என்பர் மு .இராகவ ஐயங்கார் காதலுக்காக நிகழும் மடல் ஏற்றத்தை தலைவன் மேற்கொள்ளும் ஒருவகை தற்கொலை முயற்சியாகவே மீனாட்சி சுந்தரனார் கருதுவர் .
ந.சுப்பு ரெட்டியார் ,தொல்காப்பியர் காட்டும் வாழ்க்கை என்ற நூலில் ,"காதல் ஒவ்வாக்காலை நிகழும் வரை பாய்தல் முதலிய தற்கொலை செயல்களும் இதில் அடங்கும் "என்று குறிப்பிடுவர் .மடலூர்தல் ஒரு தற்கொலை முயற்சியாகவே நூல்களில் மிக நுணுக்கமாக சுட்டப்பட்டுள்ளது .மடல்ஊர்ந்தும் காதலி கிடைக்காவிட்டால் அது தற்கொலையாகவே முடியும் அது தான் மலையில் இருந்து கீழே விழுதல் இதுவே வரை பாய்தல் என்பர் ம.சீனிவாசன் .
சங்க கால மடல்
சங்ககாலப் புலவர் ஒருவர் மடல் பற்றிப் பாடியதால் 'மடல் பாடிய மாதங்கீரனார்'என்ற சிறப்புப் பெயர் பெற்றார் .
இரண்டு சிறிய பாடல்களுக்காக இப்பெயர் பெற்றிருக்கமாட்டார் இவ்வொரு துறையில் பல பாடல்கள் ஆக்கியிருப்பார் என்பர் வ.சுப .மாணிக்கனார் .
சங்க இலக்கியத்துள் மடல் குறித்து பதின் மூன்று பாடல்கள் உள்ளன நற்றிணை (௧௪,௧௫௨,௩௪௨,௩௭௭,)குறுந்தொகை(௧௪,௧௭,௩௨,௧௭௩,௧௮௨)யில் உள்ள பாடல்கள் ஐந் திணைக்கு உரிய பாடல்கள் கலித்தொகையில் (௧௩௮ ,௧௩௯ ,௧௪0 ,௧௪௧,)உள்ள பாடல்கள் நெய்தல் திணை ஆயினும் 'ஏறிய மடல் திறம் ' என்ற பெருந்திணை குறிப்பால் பெருந்திணை யாகவே கருதப்படுகிறது .ஐந்திணையில் மடல் கூற்று மட்டுமே நிகழும் பெருந்திணையில் மடலேற்றமும் நிகழும் .மடல் ஏற்றக் காட்சியை ,
காம நோய் மிகுந்ததால் ஒருவன் மடல் ஏறத் துணிகிறான் (குறுந்தொகை ௧௭)தன் செயலுக்கு பனை மடலால் குதிரை செய்கிறான் .(கலி ௧௩௮)அக்குதிரைக்கு மணி கட்டுகிறான் .ஆவிரம்பூ மாலை அணிவிக்கிறான் (குறுந்தொகை ௧௮௨,௧௭௩)மடல் ஏறும் தன் மார்பில் எலும்பு மாலை சூடுவான் .(குறுந்தொகை -௧௮௨)மடலேருவதால் தன் நாணத்தை விடுகிறான் .(குறுந்தொகை-௧௮௨)மடன்மாவை சிறுவர்கள் இழுக்க மடலேறி மறுகில் வருகிறான் .(நற்றிணை -௨௨0)அவனைக் கண்டோர் ஆரவாரம் செய்வர் .அவன் தன் தலைவியை உலகறிய உரைப்பான் .(குறுந்தொகை-௩௫)அதனால் ஊரார் அவனுக்குரிய தலைவியை எண்ணி தூற்றுவர் .(குறுந்தொகை- ௧௪) மடலேரியவன் அன்பு மனம் கருதிய ஊரார் ,பெற்றோர் கூடியிருந்து அவன் விரும்பியவளுடன் மனம் செய்து வைப்பார்(கலி-௧௪௧)இதுவே சங்க கால மடலேற்ற முறையாகும் .
இவ்வாறு கண்டவருக்கு இரக்கம் தோன்ற தலைவன் மடலேறி தெருவில் தன் காதலைப் பாடி வந்தமை கண்டு அவள் பெற்றோர் திருமணம் முடித்து வைத்தனர்.இதனை
"வருந்த மா ஊர்ந்து மறுகின் கண் பாட"(கலி-௧௪௧)என கலித்தொகை சுட்டும்.வருந்த என்பதால் ஊரார் மடலேரியவன் பக்கம் சார்ந்தனர் என்பதும் "திருந்திழைக்கு ஒத்த "என்பதால் தலைவியும் இவனை காதலிக்கிறாள் என்பதும் பெறப்படுகிறது ."பொருந்தார்" என்ற சொல்லினாலும் உவமயினாலும் இக்காதல் உறவிற்கு பெற்றோர்கள் மனம் பொருந்தவில்லை என்பதும் ,வேறு என் செய்வது என்று கருதி வலிமையான மன்னனுக்கு கப்பம் கட்டுவது போல கட்டாயத்திற்காக கொடுத்தனர் என்பர் வ.சுப.மாணிக்கனார் .
இதிலிருந்து சங்க காலத்தில் காதலுக்காக மடலேறும் காதலனின் அன்பு மனம் புலனாகும் .மடலேர்தலின் ஒரு கூறாக வரை பாய்தல் என்ற தற்கொலை முயற்சியை சங்கப்பாடல்கள் உணர்த்துகின்றன .
குறுந்தொகை (௧௭)யில் பயின்று வரும் 'பிறிதும் ஆகுப 'என்ற சொல் மடலோடு
ஒப்புநோக்கத் தக்கதாக உள்ளது .'பிறிதும் ஆகுப'என்பது வரைபாய்தலே என்பர் நச்சினார்க்கினியர்.
மிகுந்த காமத்தால் மலை மீதிருந்து விழுந்து தற்கொலை செய்து கொள்வோரை ,
'ஆராக் காமம் அடூ உ நின்று அலைப்ப
விறு வரை வீழ்னர் '(அகம்-௩௨௨)
என்று அகநானூறு குறிப்பிடுகிறது .இவ்வாறு மடலேருதலும் வரைபாய்தலும் சங்க காலத்திய வழக்ககவே அறியமுடிகிறது .
"சங்கப்பாடல்களை நோக்கி இதனை ஒரு சமூக வழக்கமாகவே கொள்வர் செக் நாட்டு ஆய்வாளர் கமில் சுவலபில் ."பண்டைத் தமிழரிடையே நிலவிய ஏறு தழுவுதல் போல இதுவும் ஒரு சமூக வழக்காகும் என்பர் அறிஞர் ஹார்டி .மேற்க்கண்டவற்றால்மடலேறுதல் ,வரைபாய்தல் ஆகியன சமூக வழக்கமாகவே அறியமுடிகிறது .மடலேருதலுக்கு இனமான ஒரு செயலாகவே கோவை நூல்களும் வரைபய்தலை உரைக்கின்றன .
குயில்ப்பாட்டில் பாரதியார்
"காதல் காதல் காதல்
காதல் போயின் காதல் போயின்
சாதல் சாதல் .(குயில்-௧0௮௭)என்றுரைப்பர் .
காமத்தின் உச்ச நிலை அடைந்தவன் மடலேரியோ , வரை பாய்ந்தோ உயிரை மாய்த்துக் கொள்கிறான் .இதனை சிறந்த தத்துவமாக்குகிறார் எச்.எ.கிருட்டினபிள்ளை "ஏசுநாதர் மக்கள் மீது கொண்ட ஆராக்காதலால் சிலுவை ஏறி தன்னுயிரை மாய்த்தாகக் "குறிப்பிடுவர் .
வைரமுத்து 'வில்லோடு வா நிலவே ' என்ற புதினத்தில் காதலன் தன் காதலியை பெரும் கடைசி முயற்சியாக மடலேருவதையும் ,வரைபாய்வத்தையும் சிறப்பாக எடுத்துரைப்பார் .
இன்றைய சமூகத்தில் நிகழும் தற்கொலைகள் பல சூழலில் நிக்ழ்கின்றன் .எனினும் காதல் தோல்வியால் நிகழும் செய்து கொள்ளும் தற்கொலைகளே மிகுதியாகும் .சான்றாக,
ரயில் முன் பாய்ந்து
காதலர்கள் தற்கொலை (காலைக் கதிர்-௧௪0௧௧0௨00௬)
என்ற செய்தியைக் குறிப்பிடலாம் .
"நீலகிரி மலைவானரில் ஒரு வழக்கம் இருப்பதாகத் தெரிகிறது .படுகு இனத்தை சேர்ந்த இளைஞன் ஒருவன் தன் காதலியை அடைய முடியாத சூழலில் அவளை எவ்வாறேனும் அடைவேன் .இல்லாவிட்டால் தற்கொலை செய்து கொள்வேன் .என்று பலரும் அறிய சபதம் செய்வதும் அவளை அடைய முயல்வதும் அம்முயற்சியில் பெரும்பாலும் வெற்றியே பெறுவதும் இன்றும் வழக்கில் இருப்பதாக அறிஞர் தர்ஸ்டன் குறிப்பிடுவர் .
முடிவுரை :
காதலன் காதலியைப் பெரும் வழிகளில் ஒன்றாக மடல் இருந்துள்ளது .பெருந்தினைக்கு உரியதாக மடலை தொல்காபியர் சுட்டுவர்.எனினும் சங்க இலக்கியத்தில் அன்பின் ஐந்திணை யாகவே மடலேற்றம் இடம்பெறுகிறது .
நச்சினார்க்கினியர் ,மு.இராகவையங்கார் ,மீனாட்சி சுந்தரனார் ,சுப்பு ரெட்டியார் .ம.பே.சீனிவாசன் போன்ற தமிழ் அறிஞர்கள் மடலேற்றத்தை தற்கொலையாகவே கருதுவர். கமில் சுவலபில் ,ஹார்டி போன்ற அறிஞர்கள் மடலேருதலின் ஒரு கூறாக தற்கொலையைக் கருதுவர் .மேலும் இது ஏறு தழுவுதல் போன்ற சமூக வழக்கே என்று உரைப்பார்கள் .கோவை நூல்களில் மடலேறுதல் வரை பாய்தலோடு ஒப்பவைத்து உரைக்கப்படுகிறது .பாரதியாரின் குயில்ப்பாட்டு காதல் போயின் சாதல் என்றுரைக்கிறது .வைரமுத்து 'வில்லோடு வா நிலவே 'புதினத்தில் காதலுக்காக வரைபாய்ந்து தற்கொலை செய்து கொள்வதை உரைத்துள்ளார் .எச் .கிருட்டின பிள்ளை இயேசு மக்கள் மீது கொண்ட காதலுக்காக மடலேருவதாக இயம்புவர் .இன்றைய சமுதாயத்தில் காதலில் தோல்வியுற்றால் தற்கொலை செய்து கொள்வது இயல்பாக உள்ளது .இன்றும் நீலகிரி மலைவானரிடம் ,தான் விரும்ம்பிய பெண் கிடைக்காவிட்டால் தற்கொலை செய்து கொள்வது வழக்கமாக உள்ளது .
இலக்கியங்கள் சுட்டும் மடலேற்றம் உலகியல் வழக்கமாகும்
மடலேற்றத்தின் சிறு கூறாக தற்கொலை அமைகிறது .
தற்கொலை பண்டை காலத்தில் வரை பாய்தலாக இருந்தது .இன்றோ தூக்கிட்டுக் கொள்ளுதல் ,விசம்குடித்தல் ,தீ வைத்துக்கொள்ளுதல் ,ரயில் முன் பாய்தல் என பல வகையினதாகஅமைகிறது