இது தான் ஆன்மீகமோ????

ஆன்மீகம் என்பது முடிவடையாத தேடல்!

ஆன்மீகத்தைப் பற்றி, பெரிய பெரிய ஞானிகள் கூட அரிய பெரிய கருத்துக்களை முன்வைத்துச் சென்றிருக்கிறார்கள்.

ஆன்மீகம் குறித்த இளம் ஞானி ஒருவரின் சிந்தனை இன்றைய இடுகையாக...

என் மாணவன் ச.கேசவன் (இயற்பியல் துறை இரண்டாமாண்டு) ஆன்மீகம் பற்றிய தேடலோடு ஒரு கவிதையைப் படைத்து வந்தார். படித்துப் பார்த்த நான் அவர் உடலுக்கு வயது 19 இருக்கலாம் ஆனால் எழுத்துக்களுக்கு வயது 60க்குக் குறையாமல் இருக்கும் என மதிப்பீடு செய்தேன்.

இதோ அவருடைய கவிதை..

ஆன்மீகம் என்பது

அமைதிக்கு மார்க்கம்!

ஆன்மாவின் ஒழுக்கம்!

கற்பனைக்கு நெருக்கம்!

தனிமைக்கு சொர்க்கம்!

நம்பிக்கையின் விளக்கம்!

நற்கருத்துக்களின் உள்ளடக்கம்!

சான்றோரின் அனுபவச் சுருக்கம்!

பேராற்றல் கொண்ட ஆதவனை

வான்மேகம் மறைத்ததுபோல்

அண்டத்தை அடக்கிவைத்த

ஆன்மீகம் படும்பாடு பெரும்பாடு!!

இதோ சில...

வாயில்லா உயிர்களுக்கு

வாயார உணவளித்தான்!

வாயெடுத்து வாழ்த்துமுன்னே

பலிகொடுத்து பக்தி என்றான்!!

தாயின் பாதம் பதம் அறியாத ஒருவன்

ஆன்மீகம் பெயரைச் சொல்லி

பணம் உறிஞ்சும் அட்டைப்புழுவின்

பாதம் கழுவி மோட்சம் என்றான்!!

இயல்பான பெண் ஒருத்தி

சத்தமிட்டுத் தள்ளாட

சக்தி அருளாடி வந்துவிட்டாள்!

வேதவாக்கு அவள் சொல் என்றான்!!

தீயினிலே நடக்கின்றான்!

தீச்சட்டி ஏந்துகின்றான்!

சூலம் கொண்டு உடலுறுப்பை

இரத்தம் வர வருத்துகின்றான்!

இதில் என்ன இவன் வாழ்ந்துவிட்டான்?

எனக்கொன்றும் புரியவில்லை!!

இறைசிந்தனை இல்லாது

இன்புற்று வாழ்வோர் பலரே!

இறைச் சிந்தனையோடு இன்னும்

இவன் வாழும் இடம் சிறு குடிலே!!

தேங்காய் அழுகினும், வளைந்து உடையினும்

மலர் மாலை வாடினாலும், அகழ்விளக்கு அணைந்தாலும்

சிறுகாயம் ஏற்படினும்,

குற்றம் குற்றம் தெய்வக்குற்றம்??????

ஏதடா குற்றம்? எதிலடா குற்றம்?

சந்தனம் தான் ஆன்மீகம்!!

அதை ஏன் நீ

சகதியிலே கலந்துவிட்டாய்?????

இறைநம்பிக்கை தேவையல்ல

என்பதல்ல என்கருத்து!

இதில் தேவையல்ல மூடநம்பிக்கை

என்பதுதான் என்கருத்து!!

இறை நூல்கள் படிப்பதிலும்

மந்திரங்கள் ஓதுவதிலும்

தினம் வழிபாடு செய்பதிலும் தான்

இறைவன் மகிழ்கின்றானா?         

இதுதானோ ஆன்மீகம்???

இல்லை...

இறைநூல் நெறிப்படி

அதன் ஒழுக்கங்களைப்

பின்பற்றி வாழ்வதை இறைவன் விரும்புகிறானா??

இது தானோ ஆன்மீகம்???

விடை தெரியவில்லை....

தெரிந்தவர்கள் கூறுங்களேன்...

கவிதை ஆக்கம்

ச.கேசவன்

இயற்பியல் இரண்டாமாண்டு

கே.எஸ்.ஆர் கலை அறிவியல் கல்லூரி

திருச்செங்கோடு

நாமக்கல் மாவட்டம்.

தொடர்புடைய இடுகைகள்

• வயசு இளவயசு
• மனிதன் இறந்தபின்னா வாழ்கிறான்?

2020ஆம் ஆண்டு அறிவியல் கதை!

நம் அச்சத்துக்குப் பிறந்தவர்கள் இருவர்?

ஒருவர் கடவுள்!

இன்னொருவர் எமன்!

நம் தன்னம்பிக்கைக்குப் பிறந்தவர்கள் இருவர்?

ஒருவர் அறிவியல்!
இன்னொருவர் பகுத்தறிவு!

நம் தொழில்நுட்ப வளர்ச்சி எங்கோ சென்று கொண்டிருக்கிறது. இருந்தாலும் ஆன்மீகம் சார்ந்த நம்பிக்கைகளும் தொடர்ந்து வந்துகொண்டுதான் இருக்கின்றன. அறிவியல், ஆன்மீகம் என்னும் இரண்டையும் இணைக்கும் கதை ஒன்று...

எமன் தன் எம தூதர்களான நோய்க்கிருமிகளிடம்..

ஒரு ஊரில் 100 பேரின் உயிரைப் பறித்து வாருங்கள் என்று அனுப்பி வைத்தார்..

நோய்கிருமிகளும் எப்போதும் போல யார் கண்ணுக்கும் தெரியாமல் மறைந்து மறைந்து ஊருக்குள் வர முயற்சித்தன.ஆனால் வரமுடியவில்லை. ஏனென்றால் அறிவியலாளர்கள் தம் ஊரைச் சுற்றி பாதுகாப்புத் திரையை உருவாக்கியிருந்தார்கள். வெளியே கிருமிகள் வந்திருக்கின்றன என்பதை நுண்ணோக்கி வழியே அறிந்த விஞ்ஞானிகள் இணையவழியே தொடர்புகொண்டு 

நீங்கள் யார்? என்ன வேலையாக வந்திருக்கிறீர்கள்? என்று கேட்டனர்.

கிருமிகள் சொல்லின....

ஐயா அறிவியலாளர்களே.. நாங்களெல்லாம் எம தூதர்கள்.. மக்கள் தொகைப் பெருக்கத்தைக் கட்டுப்படுத்தவே எமன் எங்களை அனுப்பிவைத்தார்.. இதோ எமனின் கட்டளைச் சான்றிதழ் என்று காட்டின..

இன்று இந்த ஊரில் 100 பேரின் உயிரைப் பறித்து வரவேண்டும். இதுவே அவரின் கட்டளை... நீங்கள் ஒத்துழைத்தால் 100 பேரை மட்டும் கொண்டு செல்வோம்.. தடுத்தால் எமனின் கோபத்துக்கு உள்ளாவீர்கள்.. பிறகு அவர் இயற்கைச் சீற்றங்களை உருவாக்கிப் பேரழிவை ஏற்படுத்துவார்.. எப்படி வசதி? என்று கேட்டன..

வேறு வழியில்லாமல் அறிவியலாளர்களும்.. கிருமிகளை ஊருக்குள் அனுமதித்தனர். ஆனால் 100 பேரைத் தவிர வேறு யாரையும் கொல்லக்கூடாது என்று அனுப்பிவைத்தனர்.

சென்ற வேலை முடிந்து திரும்பி வந்த கிருமிகளிடம் எத்தனை பேரின் உயிரைப் பறித்தீர்கள் என்று கேட்டனர் அறிவியலாளர்கள்..

கிருமிகள் சொல்லின... 1000 பேர் என்று..

திகைத்துப் போன அறிவியலாளர்கள்..

ஏன் இப்படிச் செய்தீர்கள் 100பேரின் உயிரை மட்டும்தானே பறிக்கச் சென்றீர்கள்?

ஏன் இப்படி 1000 பேரின் உயிரைப் பறித்தீர்கள்? என்று கேட்டனர்.

கிருமிகள் சொல்லின...

100 பேரின் உயிரைப் பறிக்கத்தான் வந்தோம். அதற்காக ஆயிரம்பேரின் உடலில் தங்கினோம். நூறுபேரின் உயிரை மட்டுமே அழிப்பது எங்கள் 
நோக்கம்! ஆனால் நமக்கு நோய் தாக்கிவிட்டதே என்ற அச்சத்திலேயே 
பலரும் இறந்துபோய்விட்டார்கள். அதற்கு நாங்கள் என்ன செய்வது..??

அஞ்சி அஞ்சி வாழ்வோர் வாழ்வதை விட இப்படிச் செத்துப்போவதே மேல்!

உங்களுக்கு ஒரு உண்மை சொல்கிறோம் என்றன கிருமிகள்..

என்ன என்று உற்றுக் கேட்டனர் அறிவியலாளர்கள்..

கிருமிகள் சொல்லின...

“நீங்கள் எப்போது இறக்கப் போகிறீர்கள் என்பதை முடிவெடுப்பவர் எமன் என்றோ, விதி என்றோதான் நீங்கள் எண்ணிக்கொண்டிருக்கிறீர்கள்...

உண்மை என்னவென்றால்...

உங்கள் இறப்பு உங்கள் கையில்தான் இருக்கிறது. உங்கள் மனம் எப்போது பலவீனப்பட்டுப் போகிறதோ அப்போதுதான் உடலும் நோய்வாய்ப்பட்டுப் போகிறது. உங்கள் மனம் சொல்லித்தான் எமன் உங்களைத் தேடி எங்களை அனுப்புகிறான்!!

நாங்கள் வரும்போது 100 பேர்தான் இறப்பதற்கு முன்பதிவு செய்திருந்தார்கள். நாங்கள் வந்து திரும்பும் முன்னர் மீதி 900பேர் முன்பதிவு செய்துவிட்டார்கள்“ என்றன கிருமிகள்.

போங்கப்பா போய் இதற்குக் காரணம் என்ன என்று சோதனைச் சாலையில் கண்டுபிடிங்க...

எங்களுக்குத் தெரிந்தவரை உங்களோட அச்சம்தான் இதற்கெல்லாம் காரணம் என்று நினைக்கிறோம் என்று சொல்லிச் சென்றன.

தொடர்புடைய இடுகைகள்

இறந்த பின்னும் உயிர் வாழ..

எரித்தால் என்ன? புதைத்தால் என்ன?

மனிதன் இறந்தபின்னா வாழ்கிறான்..?

நம் உயிர் உள்ள இடம்...?

!! அடக்கமான பெண் !!

அடக்கமான பெண்களும் டைனசரும்  ஒன்று என்கிறார்கள்!

ஏனென்றால் இரண்டுமே இப்போது உயிரோடு இல்லையாம்!

அடக்கம் என்ற சொல்லின் பொருள்.

அடக்கமான விலை – வாங்கத்தக்க விலை

அடக்கமான மனிதர் – இறந்து புதைக்கப்பட்ட மனிதர்

அடக்கமான பெண் - மனம், மெய், மொழியால் அடக்கமான பெண்

என வழக்கில் பல பொருள் கொள்கிறோம்.

அச்சம், மடம், நாணம், பயிர்ப்பு ஆகியன பெண்களுக்கும்..

பெருமையும், வீரமும் ஆண்களுக்கும் இருக்கவேண்டிய அடிப்படைப் 

பண்புகள் என்று நம் முன்னோர் இலக்கணம் வகுத்துள்ளனர். இதன் 

பொருள் கூட இன்று பல ஆண்களுக்கும் தெரியாது பெண்களுக்கும் தெரியாது!

(பெண்களின் அடிப்படைப் பண்பு.
அச்சம்  -அச்சமில்லாமல் அச்சப்படுவது போல் நடிப்பது.  
மடம்  -தெரிந்திருந்தாலும் தெரியாததைப் போல பண்ணும் பாவனை.  
நாணம்  -சொல்ல வந்ததை (சிறிது வெட்கத்துடன்) சொல்லும் இடம்.  
பயிர்ப்பு  -தன் கணவன் அல்லாத ஓர் ஆடவன் உடல் அறியாமல் கூடத் தன்மேல் படும்போது உண்டாகும் இயல்பான அருவருப்புணர்ச்சி. மென்மைத் தன்மை என்றும் இதனைக் கூறலாம்
ஆண்களின் அடிப்படைப் பண்பு.
பெருமை – செல்வச்சிறப்பு, வலிமை, வீரம், கொடை, மனைவியையும் தன் சுற்றத்தையும் தாங்கும் பண்பு ஆகியன)

ஆண்களாக இருந்தாலும் பெண்காளாக இருந்தாலும்காதலிக்கும் போது 

இருப்பது போல திருமணத்துக்குப் பின்னர் இருப்பதில்லை. நிறைய 

மாறிவிடுகிறார்கள்.

² நாட்டுப்புற வழக்கில்………..

வீட்ல மதுரையா? சிதம்பரமா? 

என்று கேட்பார்கள்.

மதுரை என்றால் மீனாட்சி ஆட்சி போல மனைவியின் கட்டுப்பாட்டில் குடும்பம் நடக்கிறது என்றும்,

சிதம்பரம் என்றால் நடராசரின் ஆட்சிபோல கணவனின் கட்டுப்பாட்டில் குடும்பம் நடக்கிறது என்று புரிந்துகொள்வார்கள்.

இதோ ஒரு சங்ககாலக்காட்சி இங்கு குடும்பம் யார் கட்டுப்பாட்டில் 

இருக்கிறது என்று பார்ப்போம்..

தலைவன் ஒருவன் தலைவியை மறந்து பரத்தையரிடமே தங்கி நீண்ட

நாட்களுக்குப் பின் தலைவியை நாடி வருகிறான். கோபத்தோடு இருக்கும் 

தலைவியை ஆற்றுப்படுத்தத் தோழியைத் தூதாகவிடுகிறான். 

தலைமக்களின் நல்வாழ்வை விரும்பும் தோழியும் தலைவியிடம் சென்று 

தலைவனுக்காகப் பேசுகிறாள்..

இச்சூழலில் தலைவன் கேட்க தோழியிடம் கூறுவதாக தலைவி வாயில் 

மறுத்து உரைப்பதே இப்பாடல்..

தோழி.. தலைவர் நம்மோடு ஓர் ஊரிலே வாழ்ந்தாலும் நாம் இருக்கும்தெருவில் வாரார்..

 இத்தெருவில் வந்தாலும் நன்றாகத் தழுவிக் கொள்ளார்..

நாணத்தை அழித்து, சரி எது? தவறு எது? என்று எண்ணும் நல்ல அறிவை இழக்கச் செய்யும் காமமானது, வில்லால் எய்யப்பட்ட அம்பைப் போல, போய் நெடுந்தூரத்தில்அழியும்படி, அயலாருடைய சுடுகாட்டைப் போல,  நம்மைக் கண்டும் வேறொன்றும் புரியாமல், செல்லுவார்.

ஓரூர் வாழினும் சேரி வாரார் சேரி வரினும் ஆர முயங்கார் ஏதி லாளர் சுடலை போலக் காணாக் கழிப மன்னே நாணட்டு நல்லறி விழுந்த காமம் 5 வில்லுமிழ் கணையிற் சென்றுசேட்படவே. வாயிலாகப் புக்க தோழிக்குத் தலைமகள் சொல்லியது. பாலை பாடிய பெருங்கடுங்கோ. குறுந்தொகைப் பாடலின் ஆங்கில வடிவம். Though he lives in the same town he won’t come into my street and if  he comes into my street he’ll not come near and hold me close He walks by , unseeing , as if past the cremation grounds of strangers, and so my love once unashamed and senseless has fallen far away like an arrow shot from abow
குறுந்தொகை 231. மருதம் -  தலைவிகூற்று

பாடல் வழியே.

1.   தலைவியை மறந்து பரத்தையரிடம் சென்ற தலைவனின் காமத்துக்கு வில்லில் இருந்து எய்யப்பட்ட அம்பு உவமையான பொருத்தமாக உள்ளது.

2.   அன்பு சிறிதும் இன்றித் தலைவியைக் கண்ட தலைவனின் பார்வையில் தலைவி சுடலை (சுடுகாடு) போலவே காட்சியளித்தாள் என்ற உவமை தன் ஆற்றாமையையும், தலைவனின் அன்பின்மையையும் அழகுபட உணர்த்துவதாக உள்ளது.

3.   தலைவி அன்று அடக்கமான பெண் ( அவள் நற்பண்புகள் எல்லாம் வாய்க்கப்பட்டவள் என்று விரும்பிய தலைவன் திருமணம் செய்துகொண்டான்.

4.தலைவி இன்று அடக்கமான பெண் (அடக்கம் செய்யப்பட்ட சுடுகாட்டிலிருக்கும் புதைக்கபட்ட பெண்) என்ற வெறுப்பாகவே பார்த்துச் செல்கிறான்.

(ஒரு நகைச்சுவை வழக்கில் சொல்வார்கள்..

உனக்குத் திருமணம் செய்துகொள்ள பெண் எப்படி இருக்கவேண்டும் என்று ஆணிடம் கேட்டால்..

அவர் சொல்லுவார்...

நல்லா அடக்கமான பெண்ணாப் பாருங்க என்று..

அடக்கமான பெண் என்பதற்கு இப்படிக் கூடப் பொருள் இருக்கிறது என்று இந்த அகப்பாடலைக் கண்ட பின்புதான் உணர்ந்தேன்.

தொடர்புடைய இடுகைகள்.

• காதலிக்கும்போது.

• நினைத்து நினைத்து சிரித்தேன்

• சங்க இலக்கியத்தில் நகைச்சுவை.

இப்படியும் ஆங்கிலம் பேசலாம்!

அறிவுக்கு மொழி தடையல்ல!

ஆனால் காலச்சூழல் ஒரு சமூகத்தில் சில மொழிகளை உயர்வான மொழியாகவும், சில மொழிகளை இழிவான மொழிகளாகவும் பிரதிபலித்துவிடுகிறது.

ஆங்கிலம் பன்னாட்டுத் தொடர்பு மொழி என்பதால் இன்று இம்மொழிக்கு பெருமதிப்பு வழங்கிவருகின்றனர்.

இன்றைய சூழலில் ஆங்கிலம் பேசுவோரை...

இலக்கண மரபுகளின் படி ஆங்கிலம் பேசுவோர்...

இலக்கண மரபுகளின்றி பேச்சுநடையில் ஆங்கிலம் பேசுவோர்...

இரு மொழிகளைக் கலந்து ஆங்கிலம் பேசுவோர் என வகைப்பாடு செய்ய இயலும்.

இவர்களுள் ஆங்கிலத்தோடு தம் தாய்மொழியைக் கலந்துபேசுவோரின் விழுக்காடே அதிகமாக உள்ளது. இப்படிப் பேசினால்தான் இவர்களைப் பச்சைத் தமிழன் என்று மக்களும் ஏற்றுக்கொள்கிறார்கள்.

தமிழைத் தமிழாகப் பிறமொழி கலவாது பேசுவோரைக் காண்பது அரிதாகவுள்ளது.

தமிழுடன் ஆங்கிலத்தைக் கலந்து பேசுவோரைக் கண்டால் எனக்கு உடனே நினைவுக்கு வருவது இந்த இலக்கியச் செய்திதான்.

கமலாம்பால் சரித்திரத்தில் (பக்கம்17) பிராமணர்கள் தாங்கள் பேசும் பாஷையில் சமஸ்கிருத பதங்களை இடையிடையே சேர்த்துப் பேசுவதைக் கண்ட ஓர் ஆட்டிடையன், தானும் அவர்களைப் போலப் பேச எண்ணி வீட்டுக்குப் போய் தாயரை அழைத்து,

'அம்மா ஆஷ்டுகுஷ்டி வந்து வேஷ்டியைத் தின்கிறது. அதை ஓஷ்டு ஓஷ்டு' என்று சொன்னதாக ஒரு கதை உண்டு.

இந்த ஆட்டிடையனுக்கும் தமிழுடன் ஆங்கிலத்தைக் கலந்து பேசுவோருக்கும் பெரிய வேறுபாடு ஒன்றும் எனக்குத் தெரியவில்லை.

இன்று பல தமிழர்கள் தமிழ் பேசும்போது இடையிடையே..

மம்மி, டாடி, அங்கிள், ஆன்டி, சார், மேடம், சாரி, தேங்ஸ், எக்ஸ்கியுஸ்மீ, தென், பட், சோ, ஆல்ரைட், பியுட்டிபுல்... இது போன்ற சொற்களைச் செருகி, அதோடு s  ஆங்கில ஒலி அதிகமாக வருவது போலப் பேசினால் போதும் இதுதான் ஆங்கிலம் என்று எண்ணிக்கொள்கிறார்கள். இவ்வளவு தானா ஆங்கிலம்..?? காலப் போக்கில் இந்தச் சொற்கள் எல்லாம் தமிழ்ச் சொற்கள் என்று மாற்றிக்கொண்டாலும் வியப்பதற்கு எதுவுமில்லை.


செருப்பு சிறிதாக இருக்கிறதா?
செருப்பு அழகாகவுள்ளது, காலை வேண்டுமானால் வெட்டிக்கொள்ளலாம்..
என்ற சிந்தனை அறிவுடைமை ஆகுமா? சிந்திப்போம்..

தமிழ் + சமஸ்கிருதம் = மணி (ப்) பிரவாளம்

தமிழ் + ஆங்கிலம் = தமிங்கிலம்

தமிழ் + ? = ???????

தொடர்புடைய இடுகைகள்

1. தமிழனா... தமிங்கிலனா?

2.இயன்றவரை இனிய தமிழில்.


3. இன்றைய தலைமுறை


4. இன்னொரு மொழி (காணொளி)


5. ஐந்து நாக்கு மனிதர் (காணொளி)