இந்தக்குழந்தைகள் சொல்வது கேட்கிறதா?

• சுவர்  பெரிதாக இருப்பதால் கல்வி தன்னைவிட்டு மிகத்தொலைவில் இருப்பதாக இந்தக் குழந்தை எண்ணி்க்கொள்ளவில்லை. தான் கற்றுக்கொள்ளவேண்டும் என்ற உறுதியுடைய மனம் இந்தக் குழந்தையிடம் உள்ளது அதனால் வெளியே இருந்துகூட இந்தக் குழந்தையால் கற்றுக்கொள்ளமுடிகிறது..

சில குழந்தைகள் பள்ளியின் உள்ளே இருந்தும் கற்றுக்கொள்ளாமல் இருப்பதையும் நம்மால் காணமுடிகிறது.

கற்றுக்கொள்ளவேண்டும் என்ற ஆர்வம் மட்டும் 

இருந்தால் போதும் எதுவும் தடையல்ல 

என்ற உயர்ந்த சிந்தனையை இந்தக் காட்சி நமக்குப் புலப்படுத்துகிறது.

•  அந்தக் காலத்தில் குழந்தைகள் தான் புத்தகங்களைக் கிழிப்பார்கள். இன்றெல்லாம் வன்முறை உணர்வைத் தூண்டித் தவறான பாதைக்கு அழைத்துச்செல்லும் புத்தகங்கள் குழந்தைகளைக் கிழித்துவிடுகின்றன. இந்த உண்மையை அழுத்தமாகச் சொல்லும் நிழற்படம் இது.

• கல்வி - பணம் இரண்டில் எது மதிப்பு மிகுந்தது?

   பணத்தைக் கொடுத்து கல்வியை வாங்குகிறோம்

  கல்வியை விற்றுப் பணமாக்குகிறோம்

இலவசமாகக் கிடைக்கும் எதற்கும் மதிப்பிருக்காது என்பது உண்மைதான்

அதற்காக அதிகவிலைகொடுத்து இந்தக்கல்வியை வாங்கும்போது

அதைப் பெறும் மாணவர்களுக்கு மனிதாபிமானம் இருக்காது என்ற கருத்தையும் நாம் சிந்திக்கவேண்டும்.

கற்க கசடறக் கற்பவை கற்றபின்

நிற்க அதற்குத் தக

திருக்குறள் -391

தொடர்புடைய இடுகை

குழந்தைகளின் நுண்ணறிவு

இணையத்தில் உங்கள் மொழிநடை?

கருத்துச் சுதந்திரம் நிறைந்தது இன்றைய இணைய உலகம்.

யார் வேண்டுமானாலும் தம் கருத்தை முழுமையாக தெரிவிக்கும் வாய்ப்பு இன்று யாவருக்கும் உள்ளது. அதற்கான ஊடகங்களும் இன்று நிறையவே வந்துவிட்டன.

மொழியுரிமை என்றால் என்ன?என்றுதான் இன்று பலருக்குத் தெரிவதில்லை.

மொழியுரிமை என்பது ஏதோ நம் தன்விவரக்குறிப்பிலோ, விண்ணப்பங்களிலோ தாய்மொழி எது என்ற கேள்விக்குமட்டும் பயன்படக்கூடியது என்ற சிந்தனை இன்று இளம் தலைமுறையினரிடம் உள்ளது.

நம் கருத்துக்களை நம் தாய்மொழியில் வெளியிடவேண்டும்

என்ற உணர்வு இன்று பலருக்கு இல்லை.

நம் ஆங்கில அறிவைக் காட்டுவதற்கான வாய்ப்புகள் இங்கு நிறைய உள்ளன. இருந்தாலும் நாம் யார் என்று காட்ட நமக்கு நம் தாய்மொழிதானே அடையாளம். அந்த அடையாளத்தை நாம் தொலைத்துவிட்டால் எதிர்காலத்தில் நாம் தாய்மொழி என்று சொல்லிக்கொள்ள தமிழ் இருக்குமா..?

தமிழர்கள் இன்று உலகுபரவி வாழ்கின்றனர்.. சாதாரணமாக பழந்தமிழ் இலக்கியங்கள் பற்றி எழுதும் எனது வலைப்பதிவுக்கே 134 நாடுகளிலிருந்து பார்வையாளர்கள் வந்திருக்கிறார்கள் என்றால் தமிழின், தமிழரின் பரவல் என்ன என்பதை நாம் உணர்ந்துகொள்ளமுடியும்.

பல்வேறு நாடுகளில், பல்வேறு துறைகளில் பணிபுரியும் தமிழர்கள் எல்லோரும் ஒன்றாகக் கூடும் இடம் இணையம்.

சிலர் சொந்தமாக இணையதளம் வைத்திருக்கிறார்கள்

சிலர் வலைப்பதிவுகள் வைத்திருக்கிறார்கள்

குறைந்தபட்டசம் ஏதாவது சமூக தளங்களிலாவது தமது கருத்துக்களை வெளியிடுபவர்களாகவே இன்றைய தமிழர்கள் இருக்கிறார்கள்.

இருந்தாலும் இவர்கள் தம் கருத்துக்களை வெளியிட எந்த மொழியைப் பயன்படுத்துகிறார்கள்..?

என் பார்வையில்...

தமிழ் பயன்படுத்துவோர்

ஆங்கிலம் பயன்படுத்துவோர்

தமிங்கிலம் பயன்படுத்துவோர்

பிற மொழிகளைப் பயன்படுத்துவோர்

என பாகுபாடு செய்துகொள்கிறேன். இந்தத் தமிழர்கள் எல்லோரும் தம் கருத்துக்களைத் தமிழிலேயே வெளியிட்டால்..

எதிர்காலத்தில் இணையத்தில் அதிகம் பயன்படுத்தப்படும் மொழிகளின் வரிசையில் நம் தமிழ்மொழியும் இடம்பெறும் இல்லையா..

தமிழ் பயன்படுத்துவதில் உள்ள சிக்கல்கள்

இன்னும் பலர் இணையத்தில தமிழ் எவ்வாறு எழுதுவது என்றே தெரியாதவர்களாக இருக்கிறார்கள். அவர்களுக்காக நான் பரிந்துரைக்கும் இணைய பக்கங்கள்..

விக்கிப்பீடியா தமிழ்_தட்டச்சு

தமிங்கிலத்தில் எழுத

அன்பான தமிழ் உறவுகளே............. 

நம் தாய்மொழியான தமிழ்மொழி எதிர்காலத்தில் இணையத்தில் அதிகமாகப் பயன்படவேண்டும் என்ற எனது வேட்கையாக இவ்விடுகையை வெளியிடுகிறேன்..

தமிழுக்காக சில மணித்துளிகளை நீங்கள் ஒதுக்குவீர்கள் என்ற நம்பிக்கையில்...

இவ்விடுகையின் மேல்பக்கத்தில தமிழின் பரவலும், பயன்பாடும் குறித்த வாக்கெடுப்புவைத்திருக்கிறேன்.

உங்கள் கருத்துக்களை நீங்கள் வெளியிடும் ஊடகம் எது?

அதற்காக நீங்கள் பயன்படுத்தும் மொழிநடை எது?

என்பதை வாக்களித்துத் தெரியப்படுத்துங்கள் என்று

அன்புடன் கேட்டுக்கொள்கிறேன்..

நன்றி.

தொடர்புடைய இடுகைகள்

நம்மால் ஏன் முடியாது?

இணையத்தில் ஆதிக்கம் செலுத்தும் மொழிகள்

உலகாளும் முறை - UPSC EXAM TAMIL - புறநானூறு -185

உலகில் ஆட்சி செய்யும் ஒவ்வொரு அரசனுக்கும் இருக்கவேண்டிய அடிப்படைத் தகுதியை உரைப்பதாக இப்பாடல் அமைகிறது.

அரசனின் ஆட்சித்திறனை ஒரு வண்டியாக உவமித்துத் தொண்டைமான் இளந்திரையன் பாடுவதாக இப்பாடல் அமைகிறது.


ஆளுவோன் திறமையுடையவனாக இருந்தால் வண்டி எந்த இடையூறும் இன்றி இனிதாகச் செல்லும்.


அவனுக்கு சரியாக வண்டியை ஓட்டத்தெரியாவிட்டால் நாடு பகையென்னும் சேற்றில் அழுந்தி மிகப்பல துன்பங்களை அடையும். என உரைப்பதாக இப்பாடல் அமைகிறது.

            

கால்பார் கோத்து, ஞாலத்து இயக்கும் காவற் சாகாடு உகைப்போன் மாணின், ஊறுஇன்றாகி ஆறுஇனிது படுமே; உய்த்தல் தேற்றான் ஆயின், வைகலும், பகைக்கூழ் அள்ளற் பட்டு,
மிகப்பல் தீநோய் தலைத்தலைத் தருமே.
புறநானூறு -185 பாடியவர்: தொண்டைமான் இளந்திரையன்  திணை - பொதுவியல் துறை - பொருண்மொழிக் காஞ்சி




அரசனின் ஆட்சித்திறத்தை ஒரு வண்டியாக உவமித்துத் தொண்டைமான் இளந்திரையன் பாடிய இப்பாடலில்,
இந்தப் புறநானூற்றுப் பாடல் அக்கால மன்னராட்சி முறையின் நெறிமுறைகளைக் காட்சிப்படுத்துகிறது..


இந்தப்பாடலில், வண்டியைச் செலுத்துவோன் திறமையுடையவனாக இருந்தால் வண்டி எவ்வித இடையூறுகளும் இன்றி செல்லும். அதுபோல ஆட்சிசெய்யும் அரசன் அரசியல் முறையை நன்கு அறிந்தவனாக இருந்தால் நாடு நலம் பெறும். மக்கள் வளம் பெறுவார்கள். அதனால் அரசனும் சிறப்புப் பெறுவான்.


வண்டியைச் செலுத்தும் திறமை இல்லாதவனாக இருந்தால் வண்டி வழிதவறிச் சென்று சேற்றில் அழுந்தி துன்பத்திற்கு  உள்ளாகும். அதுபோல அரசாளும் முறை அறியாதவானக அரசன் இருந்தால் நாடு உட்பகை, புறப்பகை என்னும் சேற்றில் அழுந்தி அரசன் துன்பமடைவான். நாடும் சீர்கேடு அடையும். 


கால் என்றால் உருளை என்றும் பார் என்றால் வண்டியின் உறுப்புகளில் ஒன்று என்றும் பொருள் கொள்வோம். 


மன்னன் என்பதற்குப் பதிலாக அரசியல்வாதிகளையும்
வண்டி என்பதற்குப் பதிலாக நம் நாட்டையும், 
பகை என்பதற்குப் பதிலாக நம் நாடு சந்திக்கும் சவால்களையும் கருத்தில் கொள்வோம்..


தமிழ்ச்சொல் அறிவோம்
கால் - உருளை (சக்கரம்)
பார் - வண்டியின் உறுப்புகளுள் ஒன்று
ஞாலம் - உலகம்
சாகாடு - வண்டி
கைப்போன் - செலுத்துவோன்
ஊறு - துன்பம்
ஆறு - வழி
தேற்றான் - தெளியான்
அள்ளல் - சேறு
தலைத்தலை - மேலும்மேலும்

தொடர்புடைய இடுகை

                             1  அந்த மகராசன் மிக நல்லவன்

                           2    நீங்கள் வாழ்வது நாடா?

3. யாருக்கும் வெட்கமில்லை

4.விலையேற்றம்  - சில நன்மைகள்

இணையத்தில் ஆதிக்கம்செலுத்தும் மொழிகள் (தமிழ்)

இணையத்தில் தமிழ் ஆதிக்கம் செலுத்த நாம் என்ன செய்யவேண்டும்...?

கணினி, இணையம் இரண்டிலும் தமிழ் முழுமையாக இல்லை என்பதை உணர்ந்து 01 என்னும் கணினி மொழியை ஆங்கிலத்துக்குப் பயன்படுத்தியது போல தமிழ் மொழிக்கு முழுவதும் பயன்படுத்தவேண்டும். ஒருங்குறி (யுனிகோடு) என்னும் எழுத்துருச் சிக்கலுக்கு முற்றுப்புள்ளி வைக்கவேண்டும்

கணினி - இயங்குதளங்களின் பல்வேறு பதிப்புகளிலும் தமிழ் எந்த அளவுக்கு ஏற்புடைத்தாக இருக்கிறது. எந்த அளவுக்கு முரண்பட்டிருக்கிறது என்பதை அறிந்து சீர் செய்யவேண்டும்.

வன்பொருள் - தட்டச்சுப் பலகை முதல் கணினி சார்ந்த பல்வேறு கருவிகளும் ஆங்கிலமொழி வடிவத்தையே ஆதரிக்கின்றன. வன்பொருள்களும் தமிழ்பேசும் நிலையை உருவாக்கவேண்டும்.

இணையம் -  உலவிகள் தமிழுக்கேற்ப வடிவமைக்கப்பட்டுள்ளன. இருந்தாலும் முழுவதும் தமிழ் கட்டளைகளைக் கொண்ட உலவிகள் உருவாக்கப்பட்டு மக்கள் பயன்பாட்டுக்குக் கொண்டுவரவேண்டும்.

மென்பொருள்கள் - கணினியோடு பல்வேறு பணிகளைமேற்கொள்ள நாள்தோறும் உருவாக்கப்பட்டுவரும் மென்பொருள்கள் ஆங்கிலமொழியைக் கருத்தில் கொண்டே இன்றளவும் உருவாக்கப்பட்டுவருகின்றன. மென்பொருள் உருவாக்கத்தில் தமிழ்மொழிக்கு தனித்துவமான இடம்கொடுத்து மென்பொருள்கள் உருவாக்கப்படவேண்டும்.

மேகக்கணினி - வளர்ந்துவரும் தொழில்நுட்பமான மேகக்கணினி நுட்பத்தை தமிழுக்கு ஏற்ப எவ்வாறு பயன்படு்த்திக்கொள்வது என்பதுதொடர்பாக சிந்திக்கவேண்டும்.

மின்நூல்கள் - இணையத்தில் பெருகிவரும் மின்னூல்கள் இன்னும் தொழில்நுட்பங்களைப் பயன்படுத்தி சராசரி தமிழர்களுக்கும் சென்றுசேரச் செய்தல்வேண்டும்.

அலைபேசி (டேப்லட் பிசி, ஸ்மார்ட் போன்) - பெரிய பெரிய கணினி தயாரிப்பாளர்களும் இப்போது இந்த அலைபேசிகளுக்கே முக்கியத்துவம் கொடுத்து தயாரித்து வருகிறார்கள். அதனைக் கவனத்தில் கொண்டு, அலைபேசிகளின் இயங்குதளம் தொடங்கி, உலவிகள் வரை தமிழ் மொழியைப் பயன்படச் செய்தல்வேண்டும்.

மொத்தத்தில் நாம் இயல்பாக சுவாசிப்பதுபோல கணினியில் நம்தமிழ்மொழியும் இயல்பாகப் பயன்படுத்தப்படவேண்டும்.

தற்போது வளர்ந்துவரும் தொழில்நுட்பங்களுக்கேற்ப தமிழ் வளர்ந்துள்ளது எல்லா நிலைகளிலும் தமிழர்கள் பங்காற்றிவருகிறார்கள்,பயன்படுத்தி வருகிறார்கள்.

இருந்தாலும் பல்வேறு தேவைகளுக்கும் ஆங்கில மொழியின் உதவியையே நாடியிருக்கிறோம். (நம்மில் எத்தனைபேர் சமூகத்தளங்களில் தமிழைப்பயன்படுத்தி வருகிறோம்? 
இன்னும் தமிங்கிலத்தில்தானே பலரும் பயன்படு்த்தி வருகிறோம்)
அதனால் நம் அனுபவங்களையும், கண்டுபிடிப்புகளையும் முடிந்தவரை தமிழ்மொழியிலேயே பதிவு செய்வோம். 

வலைப்பதிவுகள்,முகநூல், டிவைடர், கூகுள் + என்னும் சமூகத் தளங்களில் தமிழ்மொழியின் ஆதிக்கத்தை நம் ஆளுமை வாயிலாக வெளிப்படுத்துவோம்.

தமிழ் இணையப்பல்கலைக்கழகம்
விக்கிப்பீடியா
நூலகம் 

போன்ற பல தமிழ் இணையதளங்களை உருவாக்குவோம் பயன்படுத்துவோம்.

இவ்வாறெல்லாம் நாம் ஒவ்வொருவரும் செய்தால் இணையத்தில் தமிழ் எதிர்காலத்தில் ஆதிக்கம் செலுத்தும் என்பது என் கருத்து.

எனக்குத் தெரிந்தவரை சில எதிர்காலத்தமிழ் இணையம் குறித்த எதிர்பார்ப்புகளை முன்வைத்திருக்கிறேன்.

அன்பு நண்பர்களே... தொழில்நுட்பப் பதிவர்களே எதிர்காலத் தமிழின் தேவைகுறித்த தங்களின் பார்வைகளை, கருத்துகளை ஆவலுடன் எதிர்பார்க்கிறேன்.

என்ற கருத்தை ஆழமாக சிந்தித்து நம்மால் ஆனவரை தமிழ் மொழியை இணையத்துக்கு ஏற்ப வடிவமைப்போம் வாருங்கள்....

தொடர்புடைய இடுகைகள்

1. மேகக் கணினி.

2. நம்மால் ஏன் முடியாது? 

சில நூல்களும் ஒரு குப்பைத்தொட்டியும்

ஒரு நூலகத்தில் இருந்த குப்பைத்தொட்டி தனியே புலம்ப ஆரம்பித்தது...

“இந்த நூலகத்தில் நிறையபேர் பயன்படுத்துவது என்னைத்தான். இங்கு நிறைய சுமப்பவனும் நான்தான். இருந்தாலும் என்னை யாருமே மதிப்பதில்லை. ஆனால் இங்கு யாருமே பயன்படுத்தாத நூல்கள் நிறைய உள்ளன. இருந்தாலும் அவை எதையும் சுமப்பது கூட இல்லை. இருந்தாலும் அந்த நூல்களையே எல்லோரும் மதிக்கிறார்கள். 
என்ன உலகம்டா இது..” என்று தன்னைத்தானே நொந்துகொண்டது குப்பைத்தொட்டி.

சிலநூல்கள் குப்பைத்தொட்டியின் அறியாமை குறித்து வருத்தமடைந்தன. அந்த நூல்களுள் ஒருநூல் மட்டும் குப்பைத்தொட்டிக்கு அறிவுரை சொன்னது...

நாம் எத்தனை முறை பயன்படுத்தப்படுகிறோம்?  என்பதைவிட

எதற்குப் பயன்படுகிறோம் என்பதல்லவா சிந்திக்கத்தக்கது!

நாம் எவ்வளவு சுமக்கிறோம் என்பதைவிட

எதைச் சுமக்கிறோம் என்பதுதானே விரும்பத்தக்கது!

என்று குப்பைத்தொட்டிக்கு அதன் அறியாமையைச்சுட்டிக்காட்டியது ஒரு நூல்.

இருந்தாலும் குப்பைத்தொட்டி புலம்பிக்கொண்டே இருந்தது. எல்லாம் என் தலைவிதி என்று..

(விதியை எண்ணிப் புலம்பும் மனிதர்களைக் காணும் போது என்மனதில் தோன்றிய சிந்தனையே இக்கதை)

தொடர்புடைய இடுகை

ஏட்டுச் சுரைக்காய் கறிக்குதவும்!